बिहारक विमानन क्षेत्रमे अगिला एक सालक भीतर पैघ क्रांति आबय जा रहल अछि। अगिला साल मार्च तक बिहारक करीब एक दर्जन हवाई अड्डासँ हवाई सेवा शुरू होबय जा रहल अछि। एहि साल पूर्णिया हवाई अड्डासँ हवाई सेवा शुरू होबय जा रहल अछि, मुदा अगिला साल मार्च तक बिहारक 8 टा छोट शहरसँ विमानक आवाजाही शुरू भs जाएत।
स्पिरिट एयर भारत सरकारक ‘उड़ान’ योजना आ बिहार सरकार सहयोगसँ राज्यक बहुत छोट शहरसँ हवाई सेवा शुरू करबाक घोषणा कयलक । कंपनीक अनुसार मार्च 2026 तक उड़ान सेवा शुरू भs जायत। वर्तमानमे एयरपोर्ट पर तेजीसँ काज चलि रहल अछि।
पहिल चरणमे विमानन कंपनी स्पिरिट एयर बिहारक आठ शहरसँ हवाई सेवा शुरू करत, जाहिमे बीरपुर, सहरसा, मुंगेर, मधुबनी, मुजफ्फरपुर, रक्सौल, वाल्मीकिनगर आ बिहटा शामिल अछि। ई शहर देशक प्रमुख महानगर जेना दिल्ली, मुंबई, अहमदाबाद, बेंगलुरु, हैदराबाद आ चेन्नईसँ जोड़ल जायत । एकर अलावा जमशेदपुर आ बोकारो लेल सीधा उड़ान सेवा सेहो शुरू कयल जायत। अगिला चरणमे स्पिरिट एयर सेहो अंतरराष्ट्रीय कनेक्टिविटी शुरू करत। एकर तहत बिहारसँ नेपालक कतेको शहर तक सीधा हवाई सेवा शुरू कयल जाएत। एहिमे मुजफ्फरपुरसँ काठमांडू आ जनकपुर, बीरपुरसँ राजविराज आ विराटनगर, वाल्मीकिनगरसँ काठमांडू आ भैरहवा आ बिहटा काठमांडू लेल उड़ान शामिल होयत।
उड़ान योजनाक तहत बिहारमे शुरू होबएवाला हवाई सेवाक लेल स्पिरिट एयरक दूटा विशेष प्रकारक विमान अछि। पहिल विमान आइलैंडर बीएन२टी-४८ अछि जे छोट रनवेसँ उड़ान भरि सकैत अछि। एकर उपयोग यात्री आ, माल ढोनाय आ मेडिकल इमरजेंसीकेँ लेल कयल जा सकैत अछि. दोसर विमान किंग एयर २५० अछि जे हाई परफॉर्मेंस वाला विमान अछि जे तेजीसँ उड़ैत अछि। एकर प्रेशराइज्ड केबिन अछि आ एकर उपयोग बहुत तरहक उड़ान लेल कयल जा सकैछ।
स्पिरिट एयरक कहब अछि जे इ योजना सिर्फ यात्राक सुविधा नहि अछि, बल्कि एहिसँ बिहारक ग्रामीण इलाका केर आर्थिक ताकत सेहो भेटत, स्थानीय उत्पादक नव बाजार भेटत आ लोक केर नव रोजगारक अवसर सेहो भेटत।
