बिहारमे पूर्णिया सहित पाँच जिलामे मौसम अपन गियर बदलि लेने अछि। पटना, मुजफ्फरपुर, गया, पूर्णिया, भागलपुर जिलामे तापमानमे गिरावट देखल गेल अछि। शेष जिलामे सेहो भोर-साँझ ठंढा लागय लागल अछि। राजधानी पटनामे न्यूनतम तापमान २० डिग्री सेल्सियस धरि खसि पड़ल। मौसममे एहि बदलावक कारण लोक सेहो बीमार पड़ि रहल छथि। मौसम विभाग शनिदिन उत्तर बिहारक किछु क्षेत्रमे घना कुहेसक चेतावनी जारी कयलक अछि। मौसम विभागक पूर्वानुमानक अनुसार १७ नवम्बर धरि पश्चिम चम्पारण, पूर्वी चम्पारण, मधुबनी, सीतामढ़ी आ शिवहर जिलामे मध्यमसँ घना कुहेस रहबाक सम्भावना अछि।
ड्राइवरसभसँ आग्रह कयल गेल अछि जे ओ गाड़ी चलबैत काल सावधान रहथि। भोरमे राजधानी पटना सहित लगपासक क्षेत्रमे धुंधक चादर देखल जायत। आबयवला दिनमे कुहेस घना होयबाक सम्भावना अछि। मौसम वैज्ञानिक डॉ. अब्दुल सत्तार कहलनि जे भोर आ साँझमे सापेक्षिक आर्द्रताक मात्रा शत-प्रतिशत रहबाक कारणेँ कुहेसक प्रभाव गहिंर होबय लागल अछि। भोरमे दिन धरि कुहेस रहैत अछि।
मुजफ्फरपुर सहित उत्तर बिहारक कतेको जिलामे तापमान घटलासँ अगिला दू-तीन दिनक बाद राति ठंढा होयबाक सम्भावना अछि। ओतहि पूर्वी बिहारक भागलपुर शहरमे सेहो रातिक तापमान २० डिग्री सेल्सियससँ नीचा खसि गेल अछि। यद्यपि, मौसम विभागक अनुसार, एतय मौसमक शुष्क अवधि जारी रहत।
