मजबूत रणनीतिक साझेदारीमे बदलल भारत-कतर’क सम्बन्ध

नई दिल्ली
*

प्रधानमंत्री नरेन्द्र मोदी आ अमीर शेख तमीम बिन हमद अल थानी मंगलदिन भारत-कतर सम्बन्धकेँ रणनीतिक साझेदारी केर बढ़ेबाक लेल एकटा समझौता पर हस्ताक्षर कयलनि। ई व्यापार, ऊर्जा, निवेश, नवाचार, प्रौद्योगिकी, खाद्य सुरक्षा, संस्कृति आ जनतासँ जनताक सम्बन्ध पर ध्यान केन्द्रित करत। दुनू नेता नई दिल्लीक हैदराबाद हाउसमे व्यापक चर्चा कयलनि आ आपसी हितक क्षेत्रीय आ वैश्विक मुद्दा पर विचारक आदान-प्रदान कयलनि। द्विपक्षीय रणनीतिक साझेदारी स्थापित करबाक अतिरिक्त दुनू पक्ष दोहरा कराधानसँ बचबाक आ आयकरक संबंधमे राजकोषीय चोरीकेँ रोकबा पर सेहो सहमत भेल।

एहिसँ पहिने राष्ट्रपति महलक प्रांगणमे अमीर’क औपचारिक स्वागत कयल गेल छल। हुनका संग मंत्री, वरिष्ठ अधिकारी आ एकटा व्यापारिक प्रतिनिधिमण्डल सहित एकटा उच्चस्तरीय प्रतिनिधिमण्डल सेहो छल।

प्रधानमंत्री मोदी विशेष सम्मानक रूपमे सोमदिन साँझ पालममे वायुसेना स्टेशनक दौरा कयलनि आ आमिरक स्वागत कयलनि। मार्च २०१५क बाद ई हुनकर दोसर यात्रा अछि।

शेख तमीम बिन हमद अल थानीक स्वागत कयलाक बाद प्रधानमंत्री एक्स पर लिखलनि, “हम अपन भाई, कतरक महामहिम शेख तमीम बिन हमद अल थानीक स्वागत करबाक लेल हवाई अड्डा गेलहुँ। हम हुनकर भारतमे सफल प्रवासक कामना करैत छी आ काल्हि हमर बैसारक प्रतीक्षा करैत छी।”

आमिर गर्मजोशीसँ स्वागत आ उदार आतिथ्य लेल प्रधानमंत्री, भारत सरकार आ भारतक मित्र जनताक प्रति आभार व्यक्त कयलनि। ओ दुनू देशक बीच ऐतिहासिक सम्बन्धक गहराईक उल्लेख कयलनि आ एहि बातपर जोर देलनि जे भारत कतर राज्यक सबसँ महत्वपूर्ण आर्थिक साझेदारमेसँ एक अछि।

प्रधानमंत्री मोदी सभ खाड़ी देशक संग दीर्घकालिक, ऐतिहासिक आ घनिष्ठ सम्बन्धकेँ बढ़ावा देबा पर विशेष जोर देलनि अछि। पछिला १० सालमे मध्य पूर्वक कतेको देशक संग भारतक सम्बन्ध उन्नत आ मजबूत भेल अछि।

जनतब देब जे दिसम्बरमे प्रधानमंत्री मोदी कुवैत गेला छलथि। ४३ सालमे कोनो भारतीय प्रधानमंत्रीक कोनो प्रमुख पश्चिम एशियाई देशक ई पहिल यात्रा छल। एही यात्रामे दुनू पक्षक बीच प्रमुख समझौता छल आ आब भारत-कतर सम्बन्ध एकटा रणनीतिक साझेदारीमे बदलि गेल अछि।

खाड़ी देश भारतक लेल प्रमुख व्यापार आ निवेश भागीदार अछि आ नई दिल्लीक एहि देशसभक संग एकटा मजबूत ऊर्जा साझेदारी सेहो अछि। प्रधानमंत्री नरेन्द्र मोदी सेहो कतेको बेर संयुक्त अरब अमीरात’क दौरा कऽ चुकल छथि। मई २०२२मे शुरू कयल गेल संयुक्त अरब अमीरात-भारत व्यापक आर्थिक साझेदारी समझौता (सीईपीए) आर्थिक आ व्यापारिक सहयोगकेँ एहि तरहेँ बढ़ावा देलक अछि जे दुनू देशक राष्ट्रीय विकास लक्ष्यक समर्थन करैत अछि।