बिहार विधानसभामे विपक्षक नेता तेजस्वी यादव द्वारा अपनाकेँ ‘मुख्यमंत्री’ पदक चेहरा घोषीत कएला पर भाजपा नेता आ उप मुख्यमंत्री विजय कुमार सिन्हा कहला जे चाहे कियो चंद्रगुप्त बनबाक सपना देखैत होय, मुदा तय जनताकेँ करए केर अछि।
ओ कहला जे ‘सोनाक चम्मच’ लऽ कए जन्म लेनिहार, जे अपन माता-पिताक नाम पर राजनीति करैत छथि, ओ आब चंद्रगुप्त नहि बनत। पटनामे पत्रकार सभक संग बातचीतक दौरान उप मुख्यमंत्री विजय कुमार सिन्हा कहला कि जे जमींदारी भावसँ एहि पद पर अपन अधिकार आ हक बुझैत छथि, ओ सत्ताक सर्वोच्च शिखर पर बैसबा योग्य नहि छथि। कतबो रूप बदलि लेथि, मुदा आब बिहारक जनता चाणक्य बनिक’ चंद्रगुप्त चुनत। जे जनताक जनादेश आओत, तहिसँ चंद्रगुप्त निश्चित होयत।
ओ पश्चिम बंगालमे वक्फ कानूनक मामिलामे भेल हिंसा पर कहला जे पश्चिम बंगालमे जे मानसिकताक पोषण कएल जा रहल अछि, ओहि केर ई प्रकटीकरण अछि। ओहि ठामक मुख्यमंत्री पश्चिम बंगालकेँ बांग्लादेशक स्वरूपमे ढालबाक प्रयास कऽ रहल छथि। हिंदुस्तानक लोक एकर किन्नौंह ने स्वीकार कऽ सकैत अछि।
पश्चिम बंगाल सेहो भारतक अंग अछि। पश्चिम बंगाल आ बिहारक मानसिकता राष्ट्रक प्रति सबसँ बेसी समर्पित रहल अछि। बाहरसँ आएल बांग्लादेशी मानसिकताक लोक अराजकता पसारि रहल छथि, ओकर उत्तर सही समय पर भेटत। एहेन लोक पर कठोर कारवाई होबाक चाही।
ओ 26/11 केर मुंबई आतंकवादी हमलाक आरोपी तहव्वुर राणाकेँ अमेरिकासँ प्रत्यर्पित कय भारत आनला पर कहलनि जे प्रधानमंत्री नरेंद्र मोदी एहि राष्ट्रकेँ आतंकवादसँ मुक्ति दियौलनि आ आतंकवादीक सूत्रधार पर दबिश बढ़ौने छथि। उग्रवादकेँ समाप्त कएल आ ओकर मानसिकताकेँ बदलबाक कार्य कएल। आब अपराध आ भ्रष्टाचारक मानसिकता पर चोट करबाक आवश्यकता अछि। ओ कहलनि जे प्रधानमंत्री मोदीक एहेन लोकक खिलाफ सेहो लड़ाई शुरू भ’ चुकल अछि।
