चैंपियंस ट्रॉफीमे दुबईमे वरुण चक्रवर्तीक घातक गेंदबाजीसँ भारत न्यूजीलैंडकेँ हरा देलक आ सेमीफाइनलमे ऑस्ट्रेलियासँ सामना होएत। रोहित शर्माक कप्तानीमे भारत चैंपियंस ट्रॉफी २०२५क अपन अन्तिम लीग मैचमे न्यूजीलैंडकेँ ४४ रनसँ हरा देलक। स्पिनर वरुण चक्रवर्ती मैचमे ५ विकेट लऽ कऽ भारतक लेल जीत सुनिश्चित करबामे महत्वपूर्ण भूमिका निभौलनि। हुनका प्लेयर ऑफ द मैच चुनल गेल।
एहि जीतक सङ्ग भारत २ अङ्कक लाभ प्राप्त कयलक आ अपन तीनू मैच जीतलाक बाद ६ अङ्कक सङ्ग समूह ‘ए’मे शीर्ष पर रहल।
न्यूजीलैंडकेँ हरयलाक बाद आब सेमीफाइनल मैचमे भारतक सामना ऑस्ट्रेलियासँ होयत, जे ४ मार्चकेँ ओतहि दुबईमे खेलल जायत। एम्हर टूर्नामेंटक दोसर सेमीफाइनल मैच न्यूजीलैण्ड आ दक्षिण अफ्रीकाक बीच ५ मार्चकेँ लाहौरमे होयत। जतय भारत ६ अङ्कक सङ्ग समूह ‘ए’मे शीर्ष पर रहल, न्यूजीलैंडक टीम ३मे सँ २ मैच जीतलक आ १ हारि गेल, ४ अङ्कक सङ्ग दोसर स्थानपर रहल।
भारत पहिले बल्लेबाजी करैत पचास ओवरमे ९ विकेट गंवा मात्र २४९ रन बनेलक आ २५० रनक आसान सन लक्ष्य न्यूजीलैंडकेँ देलक। भारत अपन तीनटा शीर्ष बल्लेबाज शुभमन गिल, रोहित शर्मा, आ विराट कोहलीकेँ ३ के स्कोर पर गमा देलक। ओकर बाद श्रेयस अय्यर आ अक्षर पटेल चारिम विकेटक लेल ९८ रनक साझेदारी कयलनि। श्रेयस ७९ आ अक्षर ४२ रन बनेलनि आ टीमकेँ संकटसँ बचा लेलनि। बादमे हार्दिक पांड्या ४५ रनक तेज पारी खेलैत टीमकेँ २४९ के स्कोर तक पहुँचयबामे सहायता कयलनि। विराट कोहलीक कैच ग्लेन फिलिप्स हवामे उड़ैत पकड़लनि, कॉमेंटेटर कहलनि ऐतिहासिक कैच।
वरुण चक्रवर्ती 5 विकेट लेलनि। भारत आ न्यूजीलैंडक बीच खेलल गेल मैच काफी रोमांचक छल, आ एहि मैचमे भारतीय स्पिनर १० मे सँ कुल ९ विकेट लेलनि। वरुण भारतक लेल शानदार गेंदबाजी कयलनि, १० ओवरमे ४२ रन पर ५ विकेट लेलनि, जखन कि अन्य स्पिनर कुलदीप यादव २ विकेट लेलनि, आ अक्षर पटेल आ रविन्द्र जडेजा १-१ विकेट लेलनि। भारतीय तेज गेंदबाजमे शमीकेँ कोनो सफलता नहि भेटल, जखन कि हार्दिक पांड्या १ विकेट लेलनि।
श्रेयस अय्यर 79 रन बनेलनि। भारत एहि मैचमे पहिने बल्लेबाजी कयलक, आ श्रेयस अय्यरक ७९ रन, हार्दिक पंड्याक ४५ रन, आ अक्षर पटेलक ४२ रनक सङ्ग ओ ५० ओवरमे ९ विकेट पर २४९ रनक लक्ष्य रखलक। न्यूजीलैंडकेँ जीतबाक लेल २५० रन बनेबाक आवश्यकता छल, मुदा भारतीय गेन्दबाजीक विरुद्ध ओकर बल्लेबाजी बेकार ढ़ंगसँ खसि पड़ल। अनुभवी केन विलियमसन कीवी टीमक लेल ८१ रनक शानदार पारी खेललनि, मुदा दोसर छोर पर हुनका आन केकरो सहयोग नहि भेटलनि। कीवी टीम ४५.३ ओवर मे २०५ रन पर आउट भऽ गेल। मुदा, एहि टीमक हेनरी उत्कृष्ट गेंदबाजी कयलनि आ ५ विकेट लेलनि।
एक बेर पुनः भारतीय क्रिकेट प्रेमीक रोमांच चरम पर अछि, लगले काल्हि मंगलकेँ दुबई केर ओही पिच पर सेमीफाइनलमे अस्ट्रेलियासँ टक्कर होएत। पिच स्पिनरक अछि से तय भऽ गेल अछि, फलतः पुनः भारत ४ स्पिनरक संग उतरि सकैछ। एहि मैचमे टाॅस हारि गेल छल, सेमीफाइनलमे जँ टाॅस जीतैत अछि तऽ भरिसक पहिने क्षेत्ररक्षणे लेबाक चाही, मुदा कहि नहिं। ऑस्ट्रेलियाक ग्लेन मैक्सवेल निश्चित रूपसँ सभक ध्यानमे रहत। खैर जे से, मुदा चैम्पियन ट्रॉफीक चित्र बहुत किछु एही मैचसँ तय भऽ जयबाक संभावना अछि।
