शिक्षा सीईटी बीएड केर प्रवेश परीक्षा आवेदनक तिथि बढ़ल, शीघ्र करु आवेदन Maithil Punarjagran Prakash May 28, 2024May 28, 2024 0 Comments दरभंगा समदिया * बी.एड.मे प्रवेश लेनिहार छात्रक लेल सीईटी एकटा नीक अवसर अछि। जँ अहाँ एहि पाठ्यक्रमक लेल आवेदन करय चाहैत छी तखन एखनो समय अछि। अहाँ मिथिला विश्वविद्यालयमे बीएड प्रवेश परीक्षा लेल आवेदन कऽ सकैत छी। विलंब शुल्कक संग 4 जून तक आवेदन करय केर सुविधा अछि। सारण जिलामे कानून-व्यवस्था बनाकऽ रखबाक लेल प्रशासन इंटरनेट सुविधा निलंबित कऽ देने छल। अतः छात्र समय पर बीएड लेल आवेदन नहिं कऽ पाबि रहल छलाह। एकरा देखैत ललित नारायण मिथिला विश्वविद्यालय आवेदनक तिथि बढ़ा देलक अछि। एहि संबंधमे सीईटी बीएड केर राज्य नोडल अधिकारी प्रोफेसर अशोक कुमार मेहता कहलनि जे प्रशासनिक कारण सँ सारण जिलामे इंटरनेट सुविधा बंद छल। अतः छात्र आवेदन नहिं कऽ पाबि रहल छलाह। एकरा देखैत जेपी विश्वविद्यालय, छपराक कुलपतिक आग्रह पर मिथिला विश्वविद्यालयक कुलपति प्रोफेसर संजय कुमार चौधरी छात्रक भविष्यकेँ ध्यानमे राखि प्रवेश परीक्षा फार्म भरबाक तिथि बढ़ा देलनि अछि। बिना विलंब शुल्कक सीईटी बीएड केर लेल आवेदन करय केर अंतिम तिथि २८ मई छल। अहाँ २९ मई सँ ४ जून धरि विलंब शुल्कक संग आवेदन कऽ सकैत छी। अभ्यर्थीकेँ आवेदनमे कोनो तरहक गलती वा त्रुटि केर सुधारय लेल आब 1 जून सँ 4 जून धरिक समय भेटत। अभ्यर्थी 17 जूनसँ अपन एडमिट कार्ड डाउनलोड कऽ सकैत छथि। एकरा लेल एकटा हेल्पलाइन नंबर सेहो जारी कयल गेल अछि, जे 9431041694 अछि। आब छात्र समय विस्तारक लाभ उठबैत सीईटी बीएडक लेल आवेदन कऽ सकैत छथि। Spread the love