चारि घंटासँ बेसी विचार-विमर्शक बाद सोमदिन भोरमे तीनू केन्द्रीय मंत्री आ किसान नेताक बीच चारिम चरणक बैसार समाप्त भऽ गेल। केन्द्रीय मंत्री पीयूष गोयल कहलनि जे ओ न्यूनतम समर्थन मूल्य (एमएसपी) पर दालि आ कपास किनबाक लेल किसानसभक सङ्ग पाँच सालक समझौताक प्रस्ताव देलनि अछि।
यद्यपि किसान सभ मंत्री सभकेँ कहलनि जे सोमदिन भोर १० बजे चर्चाक बाद ओ जवाब देताह।
एहि बातपर जोर दैत जे वार्ता सौहार्दपूर्ण वातावरणमे भेल आ ओ सभ किछु हद धरि आम सहमति पर पहुँचल, केन्द्रीय मंत्री पीयूष गोयल कहलनि: “नव विचारक सङ्ग हमर भारतीय किसान मजदूर संघ आ अन्य किसान नेतासभक सङ्ग सकारात्मक चर्चा भेल।” किसान संघक प्रतिनिधि लोकनि किछु सकारात्मक सुझाव देलनि अछि, एहिसँ पंजाब, हरियाणाक किसानक सङ्ग-सङ्ग देशक अन्य किसान, अर्थव्यवस्था आ उपभोक्ताकेँ लाभ होयत।
आगा ओ मिडियासँ कहलनि “हम सब मिलि कऽ एकटा बहुत इनोवेटिव, आउट-ऑफ-द-बॉक्स विचार प्रस्तावित कयलौंह अछि। सरकार एनसीसीएफ (भारतीय राष्ट्रीय सहकारी उपभोक्ता महासंघ) आ एनएएफईडी (भारतीय राष्ट्रीय कृषि सहकारी विपणन महासंघ) सन सहकारी समितिसभक लेल अगिला पाँच वर्षमे किसानसभसँ एमएसपी पर उपज किनबाक लेल एकटा अनुबंध बनयबाक प्रस्ताव रखलौंह अछि। मात्राक कोनो सीमा नहि रहत।”
कपासक खरीदक लेल गोयल कहलनि, “हमसभ प्रस्ताव देलहुँ जे भारतीय कपास निगम एमएसपी पर कपासक फसिलक खरीद लेल किसानसभक सङ्ग पाँच सालक समझौता करत।”
गोयलक अतिरिक्त, अन्य केन्द्रीय मंत्री जे मन्त्रीसभसँ बातचीत कयलनि, ओ छलाह अर्जुन मुण्डा आ नित्यानन्द राय।
किसान नेतासभक सङ्ग परामर्श शुरू करबासँ पहिने ओ पंजाबक मुख्यमंत्री भगवंत मानक सङ्ग सेक्टर १७क एकटा होटलमे अनौपचारिक बैसार कयलनि।
प्रदर्शनकारी किसान संगठनक एक छत्र संस्था संयुक्त किसान मोर्चा (एसकेएम)क पंजाब इकाई २० सँ २२ फरवरी धरि भाजपा सांसद, विधायक आ जिला अध्यक्षक खिलाफ दिन-राति पैघ स्तर पर विरोध प्रदर्शनक आह्वान कयलक अछि।
एम्हर हरियाणामे इंटरनेट सेवा पर प्रतिबंध दू दिन आओर बढ़ा कऽ १९ फरवरी धरि कऽ देल गेल अछि।
