समारोहपूर्वक मनाओल गेल ‘राष्ट्रीय मैथिली दैनिक मैथिल पुनर्जागरण प्रकाश’क पाँचम वर्षगाँठ

राँची समदिया!! शुक्र, 26 दिसंबर 2025 केँ मैथिली भाषाक राष्ट्रीय दैनिक मैथिल पुनर्जागरण प्रकाश केर प्रकाशनक पाँचम वर्षगाँठ पर आई राँचीक झारखंड मैथिली मंचक हरमू स्थित विद्यापति दलानमे तीन दिवसीय समारोहक शुभारंभ भेल। दीप प्रज्वलन एवं महाकवि विद्यापतिक चित्र पर माल्यार्पणक उपरांत “जय-जय भैरवि असुर भयाउनी” भगवती वंदनाक संग समारोहक शुभारंभ भेल। आरंभमे पटना, दरभंगा, मधुबनी, आसनसोल, नासिक आदि विभिन्न स्थानसँ आएल अभियानी एवं मैथिल पुनर्जागरण प्रकाश फोरमक पदाधिकारी तथा राँचीमे रहनिहार अभियानी एवं झारखंड मैथिली मंचक पदाधिकारीगणक पारस्परिक परिचय भेल। एहि अवसर पर नासिकसँ राँची आएल फोरम एवं मैथिल पुनर्जागरण प्रकाश समाचार पत्र आओर मिथिलाक्षर साक्षरता अभियानक संस्थापक पं. अजय नाथ झा शास्त्री अपन उद्घाटक संबोधनमे मिथिलाक्षर साक्षरता अभियान तथा मैथिल पुनर्जागरण प्रकाश त्रैमासिक पत्रिकाक प्रकाशनसँ लs कए मैथिल पुनर्जागरण प्रकाश दैनिकक प्रकाशन आ मैथिल पुनर्जागरण प्रकाश फोरमक गठन तक केर अनेक वर्षक संघर्ष यात्राक सविस्तार विवरण प्रस्तुत कयलन्हि। मैथिल पुनर्जागरण प्रकाश फोरमक स्थापना तथा एकर 13 प्रकल्पक माध्यमसँ मिथिला आओर मैथिली भाषा तथा मिथिलाक्षर केर उत्थान हेतु चलाएल जा रहल जागरूकता, शिक्षण – प्रशिक्षण एवं रोजगारपरक कौशल संवर्धन कार्यक्रम आदि पर प्रकाश दैत ओ कहलन्हि जे मैथिली भाषा अनुरागी सभ गोटयसँ मैथिली केर एहि जीवंत दैनिक अखबार मैथिल पुनर्जागरण प्रकाशकें सुगमतापूर्वक संचालित करबामे सक्रिय सहयोगक आह्वान कएलन्हि।

पूर्व पार्षद एवं एहि समारोहक मुख्य अतिथि अरुण कुमार झा कहलन्हि जे मैथिली भाषामे दैनिक अखबारक चारि वर्षसँ नियमित प्रकाशन हेतु अखबार एवं फोरमसँ जुड़ल सभ गोटय केर सराहना कैलन्हि। समारोहकें संबोधित करैत राजकुमार मिश्रा आशा व्यक्त कएलन्हि जे मैथिली दैनिकक भविष्य सुखद एवं उज्जवल होयत। एहि अवसर पर झारखंड मैथिली मंचक महासचिव जयंत झा मैथिली अखबारक नियमित प्रकाशनमे होमय वला आर्थिक कठिनाईकें रेखांकित करैत एहि दिशामे सभकें सहयोग करबाक अपील कएलन्हि।

समारोहमे मैथिल पुनर्जागरण प्रकाश फोरम एवं अखबारमे विशिष्ट योगदानक लेल अनेक गोटयकें सम्मानित कएल गेलन्हि, जाहिमे मैथिल पुनर्जागरण प्रकाश केर मैथिली समाचार बुलेटिनमे समाचार वाचक सुमित सौरभकें सर्वश्रेष्ठ समाचार वाचकक सम्मान प्रदान कएल गेलन्हि। एहि अवसर पर कृष्णकांत झा, कुमार प्रमोद चंद्र, दीपक आनंद, मल्लिक, समीर मिश्र, वीणा झा, पूनम मिश्रा, अशोक लाल, डॉ. विनय कर्ण आदिकें सेहो सम्मानित कएल गेलन्हि।

एहि समारोहमे प्रेमनाथ झा, सुकुमार झा, शशि भूषण कंठ, सतीश कुमार मिश्रा, ब्रजकुमार झा, समीर कुमार मिश्रा, कल्पना कुमारी कर्ण, बैद्यनाथ झा, संतोष कुमार मिश्रा, प्रेमचंद झा, नरेश झा समेत अनेक गणमान्य व्यक्ति उपस्थित छलथि। समारोहक संचालन समीर कुमार मिश्रा आओर धन्यवाद ज्ञापन वीणा झा कएलन्हि।