बापू परीक्षा केंद्र पर बीपीएससीक पेपर लूटबाक घटनाक सीसीटीवी फुटेजसँ खुलासा
पटना
*
बीपीएससी केर ७०म परीक्षाक दौरान पटनाक बापू परीक्षा केंद्रमे भारी हंगामा भेल छल। एहि घटनाक सीसीटीवी फुटेज वायरल भेल अछि जाहिमे किछु शरारती तत्व प्रश्नपत्र लूटैत आ फाड़ैत देखल जा रहल अछि।
बिहार लोक सेवा आयोग (बीपीएससी) केर परीक्षाक दौरान पटना शहर स्थित बापू परीक्षा केंद्र पर अभ्यर्थी सब हंगामा कयने छल। अईठाम पेपर लीकक अफवाह छल। परीक्षा रद्द करबाक माँग करैत छात्र लोकनि पटनामे विरोध प्रदर्शन कयने छलाह। एहि दौरान पटनाक जिला मजिस्ट्रेट एकटा छात्रकेँ थप्पड़ मारि देने छलाह। छात्रक विरोधक बाद आयोग स्पष्ट रूपसँ कहलक जे परीक्षाक पेपर लीक नहि भेल अछि आ फेर परीक्षा आयोजित करबाक कोनो प्रश्न नहि अछि।
एहि सब दावाक बीच पटना जिला प्रशासन एकटा सीसीटीवी फुटेज जारी कयलक अछि जे पटनाक बापू परीक्षा भवनक बारेमे कहल जा रहल अछि। उपद्रवी सभ द्वारा लूटपाट आ प्रश्नपत्र फाड़बाक घटना सीसीटीवीमे कैद भऽ गेल अछि। एकर फुटेज आब सोशल मीडियाक हर प्लेटफॉर्म पर वायरल भऽ रहल अछि। एहि वीडियोमे उपद्रवी सभ प्रश्नपत्र बाहर भेजबाक प्रयास करैत देखल जा सकैत अछि। एकर अतिरिक्त लूटल प्रश्नपत्रक पैकेट लहराबैत आ गेट तोड़ैत आ बाहर लऽ जाइत देखल जाइत अछि।
बीपीएससीक ७०म संयुक्त प्रारंभिक परीक्षाकेँ लऽ कऽ एकटा पैघ विवाद उत्पन्न भऽ गेल छल, जे शुक्रदिन दुपहरिया १२ बजे शुरू भेल छल। परीक्षाक बीचमे १ बजेक बाद सोशल मीडिया पर प्रश्न पत्र लीक होयबाक दावा सामने आयल। एहि घटनाक बाद पटनाक बापू सभागारमे छात्र सभ विरोध प्रदर्शन करय लागल। आयोगक अध्यक्ष परमार रवि मनुभाई कहलनि जे परीक्षा पूर्ण पारदर्शिता आ कड़ा सुरक्षाक बीच आयोजित कयल गेल छल। ओ स्पष्ट कयलनि जे प्रश्न पत्र अलग-अलग राज्यसँ छापल गेल छल आ परीक्षा शुरू होयबासँ तीन घंटा पहिने लॉटरीक माध्यमसँ निर्णय लेल गेल छल, कोन सेट कोन केन्द्रकेँ पठाओल जायत। ओ कहलनि जे प्रश्न पत्र लीक होयबाक अफवाह पसारयवाला पर सख्त कारवाई कयल जायत।
