दरभंगा जिलामे धार्मिक आस्थाके ठेस पहुँचाबय वाला गंभीर घटना सामने आयल अछि, लहेरियासराय थाना क्षेत्रक मदारपुर चौक पर स्थित एकटा प्राचीन धार्मिक स्थल पर उपद्रवी गर्भगृहमे प्रवेश कs सात टा माटिक बनल पिंडकेँ तोड़ि ओकरा पूर्ण रूपसँ तहस-नहस कs देलक। ई घटना तखनि सोझाँ आयल जखनि भक्त लोकनि रोजाना जकाँ पूजाक लेल धार्मिक स्थल पर पहुँचलाह | लोकसभ द्वारा भीतरक तबाही देखितहि पूरा इलाकामे हड़कंप मचि गेल।
स्थानीय लोकमे भारी आक्रोश छल आ धार्मिक स्थलक बाहर भीड़ जमा भs गेल छल, घटनाक जानकारी भेटैत दरभंगा पुलिस सक्रिय भs गेल आ तुरंत मौका पर पहुंचि स्थिति पर नियंत्रण करय लागल। दरभंगा सदरक एसडीपीओ अमित कुमार स्वयं भारी पुलिस बलक संग मौका पर पहुंचलाह आओर धार्मिक स्थल परिसर आओर आसपासक स्थिति केर जायजा लेलनि।
घटनाक गंभीरताकेँ देखैत पुलिस पूरा इलाकामे सुरक्षा कड़ा कs देलक अछि आ लगपासक सभ सीसीटीवी कैमराक फुटेज स्कैनिंग भs रहल अछि। अधिकारीक कहब छनि जे जल्दिये आरोपीक पहिचान कs कानूनक शिकंजामे लेल जाएत।
एसडीपीओ अमित कुमार कहलनि जे, घटना बहुत संवेदनशील अछि आ एकर जांच केर सर्वोच्च प्राथमिकता देल जा रहल अछि। अफवाहसँ बचबाक आ शांति कायम रखबाक अपील कयल गेल अछि।
घटनाक कारण इलाकामे तनावपूर्ण माहौल अछि, हालांकि पुलिसक सतर्कताक कारण भीड़केँ शांत कs मौकासँ हटा देल गेल अछि, वर्तमान समयमे धार्मिक स्थल परिसर आ आसपासक इलाकामे पुलिसक तैनाती बढ़ा देल गेल अछि जाहिसँ कोनो तरहक अप्रिय स्थितिसँ बाँचल जा सकय।
मदारपुर निवासी अंकुर गुप्ता एहि घटना केर सीधा आस्था पर हमला कहलनि। ओ कहलनि जे ई बहुत निन्दनीय कृत्य अछि। हम प्रशासनसँ मांग करैत छी जे एहेन कुकर्म करय वालाकेँ जल्दी गिरफ्तार कs कड़ा सजा देल जाय।
स्थानीय लोकक अनुसार ई धार्मिक स्थान क्षेत्रक लोकक आस्थाक केन्द्र अछि। एतय पूजाक लेल भारी संख्याम भक्त सभ दिन पहुंचैत छथि आ बहुत लोक एहि धार्मिक स्थल पर पूजा कs अपन दिनक शुरुआत करैत छथि | एहि पवित्र स्थान पर भेल तोड़फोड़ लोकक धार्मिक भावना पर गहींर चोट पहुँचेलक अछि।
