महिला आ ओकर पतिसँ मारि-पीटक लगेलक आरोप
*
मिदनापुर
*
पश्चिम बङ्गालमे पूर्वी मिदनापुरमे एनआईए टीमपर हमलाकेँ लऽ कऽ राज्यमे सत्तारूढ़ आ विपक्षक बीच वाकयुद्ध शुरू भऽ गेल अछि। एम्हर गिरफ्तार टीएमसी नेता मोनोब्रता जानाक पत्नीक शिकायत पर एनआईए टीम आ सीआरपीएफ अधिकारीक खिलाफ प्राथमिकी दर्ज कयल गेल अछि।
दरअसल, टीएमसी नेताक पत्नी आरोप लगओलनि जे एनआईएक अधिकारी हुनकर घरमे घुसि कऽ हुनका सभकेँ पीटि देलनि। ओ इहो आरोप लगओलनि जे अधिकारी लोकनि हुनक सम्मानकेँ ठेस पहुँचौलनि अछि। भूपतिनगर थाना मे आईपीसी केर धारा ३२५, ३४, ३५४, ३५४ (बी), ४२७, ४४८, ५०९ केर तहत मामिला दर्ज कयल गेल अछि।
बात इ भेल छल जे एनआईएक टीम वर्ष २०२२मे भेल बम विस्फोटक जाँच करबाक लेल गेल छल। एहि दौरान एनआईएक टीम दूटा आरोपीकेँ गिरफ्तार कऽ अपना सङ्ग कोलकाता आनि रहल छल, तखन एनआईएक टीमपर हमला भेल। गामक लोक एनआईए टीमक काफिलाकेँ घेरि लेलक आ पथराव कयलक। एहि हमलामे कतेको अधिकारी घायल भऽ गेलाह। एनआईए टीम पर हमलाक संबंधमे मामिला दर्ज कयल गेल अछि।
भाजपा एहि मामिलामे टीएमसी सरकार पर हमलावर अछि। भाजपा आरोप लगओलक अछि जे ममता बनर्जीक शासनकालमे राज्यमे कानून-व्यवस्थाक स्थिति खराब अछि आ ई सब पुलिसक मिलीभगतसँ भऽ रहल अछि।
एहि घटना पर प्रतिक्रिया दैत ममता बनर्जी पूछलीह, “एनआईए मध्यरात्रिमे छापा किएक मारलक ? की ओ पुलिससँ अनुमति लेलनि ? स्थानीय लोकनि वैऽह कयलनि जे हुनका जगह कोनो अजनबीकेँ आबय पर कयल जयबाक चाहैत छल। ओ पूछलनि जे, “ओ (एनआईए) चुनावसँ ठीक पहिने लोककेँ किएक गिरफ्तार कऽ रहल अछि ?”
एहि घटना पर प्रतिक्रिया दैत भाजपा नेता राहुल सिन्हा मुख्यमंत्री ममता बनर्जीपर हमलावरक समर्थनमे ठाढ़ हेबाक आरोप लगओलनि। ओ आगू कहलनि जे जतय मुख्यमंत्री हमलावर सभक समर्थन करैत छथि, ओतय हमला स्वाभाविक अछि।
