सुपौलक छतपुर प्रखंड क्षेत्रमे स्थित उत्क्रमित मध्य विद्यालय शंकरपट्टीमे मध्याह्न भोजन खयलाक बाद बीमार पड़य वाला सभ बच्चाकेँ देर राति सीएचसीमे इलाजक बाद घर भेजि देल गेल। एही मामिलामे विभागीय कारवाई सेहो शुरू कयल गेल अछि।
एमडीएममे खराब चाउरक प्रयोग आ लापरवाहीक आरोपमे विद्यालय केर प्रभारी प्रधानाध्यापक हरिश्चंद्र कुमारकेँ निलंबित कs देल गेल अछि। एहि संबंधमे शिक्षा विभागक स्थापना डीपीओ राहुल चंद्र चौधरीक जारी पत्रमे कहल गेल अछि जे प्रभारी हेडमास्टर एमडीएम तैयार करबा काल सावधानी नहि कयलनि आ बच्चा सभकेँ खराब चाउरसँ बनल भोजन खुआओल गेल। स्थलीय जांचक बाद अभिभावक आ ग्रामीण सेहो एकर पुष्टि कयलनि। निलंबन अवधिमे हेडमास्टरकेँ मुख्यालय केर प्रखंड शिक्षा पदाधिकारी राघोपुर कार्यालय केर रूपमे तय कएल गेल अछि।
एहि ठाम राजेश्वरी थानामे प्रभारी हेडमास्टर पर बीईओ नागेन्द्र चौधरी द्वारा एहि मामिलामे प्राथमिकी दर्ज कयल गेल अछि। प्राथमिकीमे बीईओ प्रभारी हेडमास्टर हरिश्चंद्र कुमार पर एमडीएममे जानि-बुझिकेँ खराब क्वालिटीक चाउरक उपयोग करबाक आरोप लगौलनि। जनतबक अनुसार मई केर पहिल सप्ताहमे विद्यालयमे 8 क्विंटल चावलक आपूर्ति कयल गेल छल। मुदा जाहि स्टोर रूममे राखल गेल छल, ओहिमे साफ-सफाई नहि छल।
विभागीय सूत्रक कहब अछि जे स्कूलक हर तिमाहीमे अनाजक आवंटन भेटैत अछि। जनवरीमे विद्यालयमे 18 क्विंटल चाउर आवंटित कयल गेल छल। मुदा 2 स 22 जून तक गर्मी छुट्टीक कारण एहि बेर आवंटन कम भs गेल। जँ गामक लोक पर विश्वास करी तs एमडीएम लेल सप्लाई कयल गेल चाउरक क्वालिटी काफी नीक छल। मुदा एकरा ठीकसँ रखरखाव नहि भेल। किछु गामक लोक कहलनि जे आपूर्ति कयल गेल चाउरक कालाबाजारी भेल आ ओकर बदलामे एमडीएममे घटिया चाउरक उपयोग भs रहल छल।
स्थानीय जीविका समूहक अध्यक्ष दुर्गा देवी कहलनि जे, पिछला तीन दिनसँ एमडीएममे खराब भोजन परोसल जा रहल अछि, ओकर जानकारी भेटि रहल छल। एहि संबंधमे हम शनिदिन भोरे जीविका समूहक गीता दीदी, श्यामा दीदी सहित पांच दीदीक संग स्कूल पहुँचलहुँ। ओतय देखलहुँ जे भंडार कक्षसँ खिचड़ी पकाबय लेल जे चाउर निकालल गेल छल ताहिमे छोट-छोट कीड़ा आ पीलू छल | आलू सेहो सड़ल छल। हम सब ओहि चाउर आ आलूकेँ हेडमास्टरकेँ पकाबयसँ मना करय लेल कहलहूँ। तखनि हेडमास्टर कहलखिन जे बाजारसँ चाउर आ आलू आनल जाएत आ भोजन पकाओल जाएत। मुदा हमरा लोकनिक गेलाक बाद हेडमास्टर साहेब फेर ओही चाउर आ आलूक संग भोजन पकबा देलनि। चाउरमे पीलू देखि किछु बच्चा सब बिना भोजन कयने स्कूलसँ भागि गेल। किछु बच्चा सभकेँ जबरदस्ती खुआओल गेल। आधा घंटाक बाद बच्चा सभक स्वास्थ्य बिगड़य लागल। देर साँझ धरि 100 सँ बेसी बच्चा अस्पतालमे भर्ती भs गेल छल। प्रायः स्कूलमे खराब गुणवत्ता वाला भोजन तैयार कयल जायत अछि। हम सब कतेको बेर सुधारक लेल कहलौं, मुदा हेडमास्टर सदिखन हमर सबहक बातके अनसुना करैत छलाह।
स्थानीय जीविका बहिनक समूहकेँ विद्यालयमे एमडीएमक गुणवत्ताक नियमित निरीक्षणक जिम्मेदारी सौंपल गेल अछि। एकर अलावा स्कूलक प्रिंसिपल आ शिक्षककेँ सेहो बच्चाक भोजन परोसयसँ पहिने ओकर स्वाद लेबय पड़ैत छनि, एकर रिपोर्टिंग सेहो दैनिक टेस्टिंग रजिस्टरमे दर्ज करय पड़ैत अछि।
एमडीएम डीपीओ महताब रहमानी कहला जे शनिदिन देर साँझमे इ घटना सामने आयल। बच्चा सभकेँ बीमार पड़लाक बाद स्कूलक प्रिंसिपल फरार भs गेल छल। एमडीएमसँ संबंधित रिपोर्टिंग सेहो नहि कयल गेल। अत: एखनि धरि इ स्पष्ट नहि भs सकल अछि जे कतेक बच्चा एमडीएम खएलक आ कोन स्तर पर लापरवाही भेल अछि। मुदा प्रथम दृष्टयामे प्रभारी हेडमास्टरकेँ लापरवाहीक कारण निलंबित कs देल गेल अछि। दोसर शिक्षककेँ सेहो शोकॉज कयल जा रहल अछि। सोमदिन जखनि स्कूल खुजत तखनि जांच केर आगू बढ़ाओल जाएत।
विभागीय अपर मुख्य सचिवक निर्देशक अनुसार एमडीएम केर गुणवत्ता सबहक जिम्मेदारी अछि। एहि लेल संबंधित लोकक खिलाफ सेहो कारवाई कयल जाएत। राजेश्वरी थाना प्रभारी संतोष कुमार कहलनि जे, घटनाक बाद छतपुर बीईओसँ प्राप्त आवेदनक आलोकमे प्रभारी हेडमास्टरक खिलाफ थाना कांड संख्या 84/25 दर्ज कयल गेल अछि। मामिलाक जांच भs रहल अछि।
