‘विश्व प्रकृति संरक्षण दिवस’ पर उठेलनि निस्सन डेग
*
दरभंगा समदिया
*
मनीगाछी प्रखंडक टटुआर पंचायत अंतर्गत बिशौल गामवासी वार्ड सदस्य लक्ष्मण राय पर्यावरण संरक्षण लेल अपन पुत्रक जन्मदिन पर केक कटबाक बजाय पौधारोपण क’ नायाब उदाहरण पेश कयलनि अछि, जकर चर्चा इलाकामे खूब जोर पकड़ने अछि।
ध्यातव्य अछि जे प्रत्येक वर्ष 28 जुलाईकें पर्यावरणक प्रति जागरूकता लेल ‘विश्व प्रकृति संरक्षण दिवस’ मनाओल जाइत अछि। ई हमरा लोकनिकें स्मरण करबैछ जे जँ हमरा लोकनि शीघ्र नहि सम्हरलहुँ त’ भविष्यमे मानव समुदाय लेल गंभीर संकट उत्पन्न भ’ जायत। कारण प्रकृति, मानव जीवनक मूल-स्रोत आ आधार-बिंदु अछि। जल, वायु, गाछ-वृक्ष, जीव-जंतु-सब मानव जीवनक अस्तित्व लेल अनिवार्य अछि। मुदा, भौतिकवादी सुख सुविधाक मोह फाँसक वर्तमान आन्हर दौड़मे हम निरंतर प्रकृति केर दोहन करैत जा रहल छी। फलाफल जलवायु परिवर्तन, प्रदूषण आ जैव-विविधताक निरंतर विनाश होइत जा रहल अछि।
मौका पर लक्ष्मण राय कहलनि जे हमरा लोकनि देखिए रहल छी जे गाछ-वृक्षक अंधाधुंध कटाई, जीवाश्म ईंधन केर अत्यधिक उपयोग आ प्रदूषण, ग्लोबल वार्मिंगकें बढ़ा देने अछि। नतीजा अछि जे ग्लेशियर निरंतर पिघलि रहल अछि, समुद्रक जलस्तर बढि रहल अछि आ मौसम चक्र अस्त-व्यस्त भ’ गेल अछि। एनामे हमरा मोनमे विचार आयल जे जँ हम एखनो प्रकृति संरक्षणकें गंभीरतासँ नहि लेलहुँ त’ भावी पीढीकें भीषण प्राकृतिक आपदाक सामना करय पड़त आ हम अपन पुत्र केर जन्मदिन पर केक कटबाक बजाय गाछ लगेबाक संकल्प लेलहुँ।
पंचायतक मुखिया गुड़िया देवी, लक्ष्मण राय केर संकल्पकें पर्यावरण संरक्षण लेल महत्वपूर्ण निर्णय बतबैत पंचयात आ पंचयातसँ बाहरक लोककें सेहो एहिसँ सीख लेबाक सलाह देलनि।
एहि अवसर पर शंभु राम, श्याम सुंदर, शुभकला देवी, उषा देवी, चंदा और आरती केर उल्लेखनीय उपस्थिति रहल।
