मंगल दिनक बिहार सरकारक कैबिनेट बैसारमे कुल 24टा एजेंडाकेँ मंजूरी भेटल अछि। एहिमे सीतामढ़ी जिलामे पुनौराधाम माता जानकी मंदिर निर्माण लेल 882 करोड़ टका जारी करबाक निर्णय लेल गेल अछि। निर्णय केर अनुसार मंदिरक निर्माण तीन चरणमे होयत।
सीतामढ़ी स्थित ऐतिहासिक पुनौरा धाममे माता जानकी मंदिरक भव्य निर्माणक लेल 882 करोड़ 87 लाख रुपैया जारी भेल अछि। मंदिर निर्माण कार्य तीन चरणमे करबाक निर्णय लेल गेल अछि। एहिमे 137.34 करोड़क लागतसँ पुनौराधाम स्थित पुरान मंदिरक नवीनीकरणक काज, 728 करोड़ टका खर्च पर्यटनसँ संबंधित बुनियादी ढांचाक विकास आ 10 साल धरि एकर रखरखाव पर 16.62 करोड़ टका खर्चक प्रावधान कयल गेल अछि।
मंगलदिन मुख्यमंत्री नीतीश कुमारक अध्यक्षतामे भेल मंत्रिमंडलक बैसारमे एहि केर मंजूरी देल गेल। एहिमे 24टा एजेंडाक मंजूरी देल गेल। ई जनतब सूचना भवनक सभागारमे आयोजित पत्रकार सम्मेलनमे कैबिनेट सचिवालय विभागक अपर मुख्य सचिव डॉ. एस. सिद्धार्थ देलनि। ओ कहलनि धार्मिक पर्यटन देशक संस्कृतिक अभिन्न अंग अछि।
देवी सीताक जन्मस्थली पुनौराधाम केर धार्मिक आ पर्यटनक विशेष महत्व अछी। एकरा देखैत अयोध्याक श्री राम मंदिरक तर्ज पर पुनौराधाममे माता जानकी मंदिरक निर्माण भऽ रहल अछि।
जनतब केर अनुसार योजनाक क्रियान्वयनक लेल ईपीसी मॉडल पर निविदाक प्रकाशन, योजनाक निष्पादन आ क्रियान्वयन बिहार राज्य पर्यटन विकास निगमक स्तर पर भऽ रहल अछि। ई स्थान रामायण सर्किटक एकटा प्रमुख अंग अछि ।
ओ कहलनि जे, भगवती सीताक जन्मस्थली पुनौराधामक धार्मिक आ पर्यटनक विशेष महत्व अछि। सरकारक एहि प्रयाससँ अयोध्या धाम आ पुनौराधामक बीच सीधा संपर्क बनि जायत। व्यापक जनहितमे भक्त लोकनिक भावना आ पर्यटनक व्यापक विकासक संभावनाकेँ ध्यानमे राखि मौजूदा पुनौराधामक रामायण परिपथक रूपमे विकसित कयल जायत।
