अमेरिका आ चीन जिनेवामे उच्च-स्तरीय व्यापार वार्ताक बाद ई निर्णय लेलक। अमेरिका आ चीनमे व्यापार युद्ध कम करबाक लेल सहमति बनल अछि। वाशिंगटन आ बीजिंग दुनू रेसिप्रोकल टैरिफ कम करबाक लेल एकटा समझौता पर सहमति देलक। दुनू देश अगिला 90 दिनक लेल एक-दोसरकें लगायल रेसिप्रोकल टैरिफकेँ 115% कम करत। चूँकि अमेरिका एखन धरि चीनसँ आवि रहल सामान पर 145% टैरिफ लागू कयने छल, ई आब 90 दिनक लेल घटि कय 30% रहि जायत। चीन अमेरिकी सामान पर 125% टैरिफ लगौने छल, जे घटि कय मात्र 10% पर आबि जायत।
जिनेवामे चीनी अधिकारी संग बातचीतक बाद, अमेरिकी ट्रेजरी सचिव स्कॉट बेसेंट मीडियाकेँ कहलनि जे दुनू देश 90 दिन धरि टैरिफ रोकबा लेल एकटा समझौता पर पहुँचल अछि आ रेसिप्रोकल टैरिफमे 115 प्रतिशतक कमी आबि रहल अछि। बेसेंट कहलनि, “हम चीनक बाजारकेँ अमेरिकी वस्तु लेल आर अधिक खुजल देखय चाहब।”
एहि घोषणाक बाद चीनक वाणिज्य मंत्रालय उम्मीद जतौलक अछि जे अमेरिका व्यापार पर “चीनक संग काज करैत रहत”। ओ कहलनि जे टैरिफमे कमी “दुनियाक सामान्य हित” केँ देखैत कयल गेल अछि। ई घोषणा चीन आ अमेरिकाकेँ बीच स्विट्ज़रलैंडक जिनेवामे पिछला सप्ताहांत भेल व्यापार वार्ताक बाद आयल अछि। अमेरिकी राष्ट्रपति डोनाल्ड ट्रंप द्वारा जनवरीमे अमेरिकामे चीनक सामान पर भारी टैरिफ लागेला केर बाद शुरू भेल व्यापार युद्धक बाद दुनू देशक बीच ई पहिल बैसार छल।
डीलक बाद एकटा संयुक्त बयानमे पुष्टि कएल गेल अछि कि टैरिफमे 90 दिन केर ई कटौती 14 मईसँ शुरू होयत। एहीमे ईहो कहल गेल अछि कि दुनू देश “आर्थिक आ व्यापार संबंध सभक बारेमे चर्चा जारी रखबाक लेल एक तंत्र/मैकेनिज्म स्थापित करत।” स्कॉट बेसेंट अमेरिका केर प्रतिनिधित्व करताह आ उप प्रधानमंत्री हे लिफेंग चीनी सरकार केर प्रतिनिधित्व करताह। दुनू देशक बीच आगूक बातचीत अमेरिका, चीन वा कोनो सहमत तेसर पक्ष केर देशमे भऽ सकैत अछि। टैरिफमे एही स्तरक पैघ कटौती केर खबरिसँ शेयर बजारमे तेजी आयल।
