ब्रिटेनक प्रधानमन्त्री कीर स्टारमर यूक्रेनकेँ सहायता करबाक महत्वपूर्ण घोषणा कयलनि। ओ कहलनि जे ब्रिटेन कीवक लेल ५,००० सँ बेसी वायु रक्षा मिसाइलक खरीदक लेल ब्रिटिश निर्यात वित्तसँ १.६ अरब पाउंड (२ अरब डॉलर)क उपयोगक अनुमति देत।
रविदिन लन्दनमे पश्चिमी नेतासभक सङ्ग शिखर सम्मेलनक बाद एकटा संवाददाता सम्मेलनमे स्टारमर कहलनि, “ई बुनियादी ढाँचाक सुरक्षा आ यूक्रेनक मजबूतीक लेल महत्वपूर्ण होयत।”
सिन्हुआ समाचार एजेंसीक अनुसार, स्टारमर कहलनि जे एकर उद्देश्य ‘यूक्रेनकेँ सबसँ मजबूत स्थितिमे आनब’ अछि जाहिसँ देश बेहतर स्थितिमे रहि बातचीत कऽ सकय।
स्टारमर कहलनि जे शिखर सम्मेलनक नेता यूक्रेनमे शान्तिक गारंटी देबाक लेल चारि चरणक योजना पर सहमत भेलाह। एहिमे यूक्रेनक लेल सैन्य समर्थन जारी राखब शामिल छैक जाबत धरि संघर्ष जारी रहैत छैक, रूस पर आर्थिक दबाव बढ़ायब, ई सुनिश्चित करब जे कोनो स्थायी शान्ति यूक्रेनक संप्रभुता आ सुरक्षाक गारंटी देबय, आ यूक्रेनकेँ कोनो वार्तामे भाग लेबाक अनुमति देबय, शान्ति समझौताक स्थितिमे ‘रूस द्वारा भविष्यमे कोनो आक्रामकता’केँ रोकनाइ, यूक्रेनक रक्षा आ देशमे शान्ति कायम रखबाक लेल ‘इच्छुक लोकक गठबंधन’क स्थापना करब सम्मिलित अछि।
स्टारमर कहलनि जे नेता लोकनि एहि प्रयासक लेल गति बनाकऽ रखबाक लेल जल्दिये फेरसँ बैसार करबाक लेल सहमत भेलाह। ओ कहलनि, ‘यूरोपकेँ भारी काज करय केर चाही।’
ब्रिटिश प्रधानमन्त्री एहि बातपर जोर देलनि जे एहि समझौताकेँ अमेरिकासँ समर्थनक आवश्यकता अछि। ओ कहलनि, “हम ई स्पष्ट कय दी जे हम स्थायी शान्तिक तत्काल आवश्यकतापर ट्रम्पसँ सहमत छी। आब हमरा सभकेँ एक संग काज करए केर जरूरत अछि।”
शिखर सम्मेलनसँ पहिने स्टारमर घोषणा कयलनि जे ब्रिटेन, फ्रांस, आ यूक्रेन अमेरिकाक समक्ष प्रस्तुत करबाक लेल युद्धविराम योजनापर काज करत। ओ ‘स्थायी शान्ति’ प्राप्त करबाक लेल तीनटा आवश्यक बिन्दुक नाम देलनि – एकटा मजबूत यूक्रेन, सुरक्षा गारंटीक सङ्ग एकटा यूरोपीय तत्व, आ एकटा अमेरिकी बैकस्टॉप, एहिमे तेसर ‘गहन’ चर्चाक विषय अछि।
ई शिखर सम्मेलन एहि सप्ताहक आरम्भमे व्हाइट हाउसमे यूक्रेनक राष्ट्रपति वोलोदिमिर जेलेन्स्की आ अमेरिकी राष्ट्रपति डोनाल्ड ट्रम्पक बीच गरमागरम बहसक बाद भेल अछि। शनिदिन ज़ेलेंस्की १० डाउनिंग स्ट्रीटमे स्टारमरसँ भेंट कयलनि, जतय ब्रिटिश प्रधानमन्त्री यूक्रेनमे स्थायी शान्ति प्राप्त करबाक लेल यूकेक ‘अटूट दृढ़ संकल्प’क पुष्टि कयलनि। बैसारक बाद यूक्रेनक वित्त मंत्री सेरही मार्चेको घोषणा कयलनि जे लंदन आ कीव यूक्रेनक रक्षा क्षमताकेँ बढ़यबाक लेल २.२६ अरब पाउंडक ऋण पर सहमत भेल।
