प्रधानमंत्री नरेंद्र मोदीक अध्यक्षतामे भेल बैसारमे राष्ट्रीय जनतांत्रिक गठबंधन (राजग) एकजुटताक प्रदर्शन कयलक। राजगक मुख्यमंत्री आ उपमुख्यमंत्री ऑपरेशन सिंदूरमे सशस्त्र बलक वीरता आ पीएम मोदीक साहसी नेतृत्वक सराहना करैत प्रस्ताव पारित कयलनि।
केंद्रीय मंत्री आ भाजपाक राष्ट्रीय अध्यक्ष जे.पी. नड्डा बैसारक बाद प्रेस कॉन्फ्रेंसमे बैसारक जनतब देलनि। ओ कहलनि जे आई प्रधानमंत्री मोदीक नेतृत्वमे राजगक सीएम कॉन्क्लेव भेल। एहि कॉन्क्लेवमे दुटा प्रस्ताव पारित भेल। बैसारमे ‘ऑपरेशन सिंदूर’क दौरान भारतीय सशस्त्र बलक वीरता आ प्रधानमंत्री नरेंद्र मोदीक साहसी नेतृत्वक सराहना करैत एकटा प्रस्ताव पारित भेल। ताहि केर संग बैसारमे जातिगत जनगणना पर चर्चा भेल। एहि समय अगिला जनगणनामे जाति गणना कराबय केर केंद्र सरकारक निर्णयक सराहना कएल गेल। एकर अलावा बैसारक दौरान पीएम मोदी पार्टीक नेताकेँ किछु जरूरी निर्देशों देलनि।
बैसारक दौरान पीएम मोदी संघर्ष विराम पर सेहो टिप्पणी कयलनि। संगहि प्रधानमंत्री मोदी बैसारक दौरान भाजपा नेता सभकेँ बेवजहक बयानबाजीसँ बचबाक लेल कहलनि।
एनडीए केर मुख्यमंत्री सभकेँ संबोधित करैत प्रधानमंत्री नरेंद्र मोदी जातिगणना पर चर्चा करैत कहलनि जे ई हुनकर सरकारक ओहि मॉडलक दिशामे एकटा डेग अछि, जाहि अंतर्गत ओ हाशिआ पर पड़ल लोक आ हर क्षेत्रमे पिछड़ल लोककेँ विकासक मुख्यधारामे आनबाक प्रतिबद्धता अछि। ओ कहलनि जे ऑपरेशन सिंदूरक सफलता देशकेँ आत्मनिर्भरता केर दिशामे प्राप्त उपलब्धि केर पुष्टि सेहो करैत अछि, जाहिमे स्वदेशी रक्षा प्रौद्योगिकी केर सटीकता सेहो संसार देखलक।
राष्ट्रीय अध्यक्ष जेपी नड्डा कहलनि जे बैसारमे नक्सली केर खिलाफ चलि रहल अभियान पर सेहो चर्चा भेल। नक्सलवाद लेल जे योजना चलि रहल अछि, ओहि पर चर्चा भेल। केंद्रीय गृह मंत्री अमित शाह सेहो रणनीति पर चर्चा कयलनि आओर मार्गदर्शन कयलनि आ सभ मुख्यमंत्री संग उपमुख्यमंत्रीकेँ कहलनि जे हम नक्सलीकेँ हारबय लेल अपन ताकत आ युक्तिक उपयोग कोना कयलहुँ अछि। ओहि चर्चामे छत्तीसगढ़क सीएम कहलनि जे हम नक्सलवादक खिलाफ कोन तरहक लड़ाई लड़लहुँ अछि आ हमरा केना सफलता भेटि रहल अछि।
सूत्रक अनुसार बैसारमे ऑपरेशन सिंदूर आ जाति जनगणनाक अलावा मोदी सरकारक तेसर कार्यकालक पहिल वर्षगांठ आ सुशासन आ बिहार चुनावक मुद्दा पर चर्चा भेल। संगहि विभिन्न राजग शासित सरकार सबहक द्वारा अपनाओल गेल सर्वोत्तम डेग सभ पर सेहो विचार-विमर्श भेल। किछु राज्यक मुख्यमंत्री सभ अपन प्रमुख योजना पर प्रस्तुति सेहो देलनि।
