बिहार शिक्षक बहालीक लेल तेसर चरणक भर्ती परीक्षा तिथिमे बदलाव कएल गेल अछि। परीक्षा आब जूनक बदला जुलाईमे आयोजित कयल जायत।
बिहार लोक सेवा आयोग (बीपीएससी) शिक्षक भर्तीक तेसर चरणक डेटशीट जारी कऽ देलक अछि। परीक्षा १९ सँ २२ जुलाई तक आयोजित होएत। एहि भर्ती परीक्षाक माध्यमसँ ८७ हजारसँ बेसी शिक्षक पद पर भर्ती होएत। आयोग पहिने २७ सँ २९ जून धरि परीक्षा आयोजित करबाक कार्यक्रम जारी कयने छल, मुदा आब एकरा बदलि देल गेल अछि। बीपीएससी सेहो एहि संबंधमे अधिसूचना जारी कयलक अछि।
तेसर चरणक भर्ती परीक्षाक तिथि कतेको बेर बदलल जा चुकल अछि। लोक सेवा आयोग तेसर चरणक भर्ती प्रक्रियाक माध्यमसँ कुल ८७,७७४ शिक्षकक भर्ती करत। एकर तहत अतिथि शिक्षककेँ सेहो मौका देल गेल अछि। अतिथि शिक्षकक आवेदन ४ सँ १० जून धरि स्वीकार कयल गेल छल।
बीपीएससी राज्यभरिमे तेसर चरणक शिक्षक भर्तीक लेल निर्धारित विभिन्न केन्द्र सभ पर परीक्षाक आयोजन १५ मार्चकेँ कयने छल। परीक्षा दू पालीमे भेल छल, मुदा पेपर लीकक कारण आयोग परीक्षा रद्द कऽ देलक। आब परीक्षा फेरसँ आयोजित कएल जाएत।
आयोग निर्धारित समय पर परीक्षामे शामिल होबय लेल पंजीकृत अभ्यर्थीकेँ प्रवेश पत्र जारी करत। प्रवेश पत्र बीपीएससी केर आधिकारिक वेबसाइट पर जारी कयल जायत, जकरा उम्मीदवार पंजीकरण संख्या आ जन्म तिथिक माध्यमसँ डाउनलोड कऽ सकैत छथि। अभ्यर्थी सभकेँ ध्यान रखबाक चाही जे हॉल टिकट डाक वा अन्य माध्यमसँ केकरो नहिं पठाओल जायत।
प्रवेश पत्रक संग एकटा आधिकारिक पहचान पत्र सेहो परीक्षा केंद्र पर लेबय पड़त। तेसर चरणक परीक्षा एक पालीमे आयोजित कयल जायत। संगहि एहि भर्ती प्रक्रियाक तहत साक्षात्कार आयोजित नहिं कयल जायत। परीक्षामे सफल अभ्यर्थीक दस्तावेज सत्यापन होयत आ तखन हुनका नियुक्ति देल जायत।
