बिहार लोक सेवा आयोग (बीपीएससी) ७०म संयुक्त प्रारंभिक परीक्षा रद्द करबाक माँग करैत बृहस्पति दिन नवम दिन सेहो अभ्यर्थी सभ अपन विरोध प्रदर्शन जारी रखलक। पटनाक गर्दनीबाग विरोध स्थल पर पैघ संख्यामे उम्मीदवार धरना पर बैसल अछि आ प्रदर्शन कऽ रहल अछि।
एम्हर प्रख्यात शिक्षक गुरु रहमान सेहो छात्रक विरोधक सङ्ग देबय पहुँचलाह। शिक्षक गुरु रहमान प्रदर्शनकारी छात्रसभकेँ प्रोत्साहित कयलनि। संवाददाता सभक सङ्ग चर्चाक क्रममे ओ कहलनि जे फेरसँ जाँचक अतिरिक्त दोसर कोनो माँग नहि अछि। आब सभ छात्र आ शिक्षक एकजुट छथि।
बुधदिनक पुलिसक लाठीचार्जक निन्दा करैत ओ कहलनि जे जाहि तरहें पुलिस द्वारा बालिकासभकेँ मारल गेल ओ गलत छल आ एकर जाँच होयबाक चाही।
एहिसँ पहिने पटनाक गर्दनीबाग धरनास्थल पर बैसल बीपीएससी अभ्यर्थी सभक धैर्य जबाब दऽ देने छल, बुधदिन ओ सभ अपन माँगकेँ लेल बीपीएससी कार्यालय घेरय पहुँचल छलाह, जतय पुलिस हुनका सभपर लाठीचार्ज कयलक। लाठीचार्जमे कतेको उम्मीदवार भयंकर रुपसँ घायल भऽ गेलाह। आरोप अछि जे एहि अवधिमे लड़कीसभकेँ सेहो मारल-पीटल गेल छल।
पटनाक बापू भवन परीक्षा केन्द्रमे प्रश्न पत्र लीक होयबाक अफवाह १३ दिसम्बरकेँ आयोजित संयुक्त प्रतियोगी परीक्षाक दौरान पसरि गेल छल, जकर बाद सैकड़ों अभ्यर्थी अपन विरोध दर्ज करबा लेल परीक्षाक बहिष्कार कयलनि।
एकर बाद बीपीएससी बापू परीक्षा परिसरमे फेरसँ परीक्षा आयोजित करबाक आदेश देलक अछि। दोसर दिसि पटनाक गर्दनीबागमे छात्र सभ धरना पर बैसल छथि आ पूरा परीक्षा रद्द करबाक मांग कऽ रहल छथि।
