पटनाक समीप बाढ़िमे गंगामे नाव डूबल, राहत आ बचाव जारी
पटना
*
राजधानी पटनाक समीप बाढ़िमे एकटा पैघ दुर्घटना भेल अछि। एतय गंगा नदीमे एकटा नाव पलटि गेल। नावमे १७ आदमी छल। तेरह लोककेँ बचा लेल गेल अछि जखन कि लापता लोकक पता लगाओल जा रहल अछि। वास्तवमे गंगा दशहराक अवसर पर एके परिवारक १७ गोटे नाव पर गंगा पार स्नान करय जा रहल छलाह। एम्हर ई दुर्घटना भेल।
जहिना नाव पलटल, गंगाक कातमे ठाढ़ लोक हरकतमे आबि गेल। संगहि गंगामे उपस्थित स्थानीय नाविक लोकसभकेँ बचाबय लागल। लगभग एक दर्जन लोककेँ कोनो तरहेँ तैरि कऽ बचा लेल गेल अछि, जखन कि पाँच गोटे एखनो लापता छथि जिनकर खोज कयल जा रहल अछि।
एसडीआरएफक टीम खोज अभियानक लेल तैनात
बाढ़ि अनुमंडलक एसडीएम शुभम कुमार बतौलनि जे नाव पर कुल १७ गोटे सवार छलाह। १३ लोककेँ सुरक्षित बचा लेल गेल अछि जखन कि ४ लापता लोकक तलाश कयल जा रहल अछि। ओ कहलनि जे लापता लोकक खोजक लेल गंगा नदीमे एसडीआरएफक टीम तैनात कयल गेल अछि।
कहल जा रहल अछि जे नाव पर सवार सभ लोक एके परिवारक छथि आ ओ मालती गामक निवासी छथि। इहो कहल जा रहल अछि जे नाव पर महिला आ बच्चा छल, ओना एहि मामिलामे प्रशासनक लोक स्पष्ट शब्दमे नहिं बता पाबि रहल छथि जे नाव पर कतेक महिला आ कतेक बच्चा छल।
