प्रधानमंत्री नरेंद्र मोदी हरियाणाक यमुनानगरमे आयोजित एकटा कार्यक्रममे कांग्रेस पार्टी पर कठोर हमला करैत कहलनि जे आई जखनि देश ऊर्जा क्षेत्रमे आत्मनिर्भर बनबाक दिशामे आगू बढ़ि रहल अछि, तखनि हमरा कांग्रेसक शासनकालक ओ दिन नहि बिसरय चाही जखनि पूरा देशमे ब्लैकआउट सामान्य बात छल।
पीएम मोदी कहलनि, “हमरा कांग्रेसक दिन नहि बिसरय चाही। 2014 सँ पहिने जखनि कांग्रेसक सरकार छल, तखनि हम ओ दिन सभ सेहो देखलियै जखन पूरा देशमे ब्लैकआउट होइत छल, बिजली गुल भऽ जाइत छल। यदि कांग्रेसक सरकार रहैत तँ देशकेँ एखनो एहेन ब्लैकआउटसँ गुजरय पड़ैत। नहि कारखाना चलि पाओत, नहि रेल, नहि खेतमे पानि पहुँचैत, मतलब कांग्रेसक सरकार रहैत, तँ एहेन संकट बनल रहैत।
कार्यक्रममे प्रधानमंत्री जनक दीनबंधु छोटूराम थर्मल पावर प्रोजेक्टक तेसर इकाई केर शुरुआत कएलनि, जाहिसँ यमुनानगर आ लग-पासक उद्योग क्षेत्रकेँ विशेष फायदा होयबाक उम्मीद अछि। पावर प्लांटक विशेषता बतबैत पीएम मोदी कहलनि जे हरियाणामे एहि समय 16,000 मेगावाट बिजलीक उत्पादन भ’ रहल अछि आ आगाँक वर्षमे एकरा 24,000 मेगावाट धरि पहुँचाबयक लक्ष्य अछि। ओ कहलनि जे बिजली उत्पादनक संगहि हम देशक नागरिककेँ ‘पावर जनरेटर’ बना रहल छी। एहि दिशा में “पीएम सूर्यघर मुफ्त बिजली योजना” केर शुरुआत कएल गेल अछि, जाहि केर तहत लोक अपन छत पर सोलर पैनल लगाकऽ केवल अपन बिजली बिल शून्य नहि क’ सकैत अछि, बल्कि अतिरिक्त बिजली बेचिकऽ आमदनी सेहो क’ सकैत अछि। एखनि धरि देशक 1.25 करोड़सँ बेसी लोक एहि योजनाक अंतर्गत रजिस्ट्रेशन क’ चुकल अछि आ हरियाणाक लाखों नागरिक सेहो एकरासँ जुड़ि चुकल छथि।
प्रधानमंत्री मोदी कहलनि जे एहि योजनासँ एकटा नवका इकोसिस्टम तैयार भऽ रहल अछि जाहिमे नव स्किल्स, कंपनी लेल अवसर आ युवाक लेल रोजगारक रास्ता खुलि रहल अछि। ओ कहलनि जे छोटका शहर आ गामसभमे छोटका उद्योगसभकेँ ऊर्जाक आपूर्तिक संग-संग सरकार ई सेहो सुनिश्चित कऽ रहल अछि जे हुनका सभक पास पूंजीक कमी नहि होय। कोरोना कालक दौरान एमएसएमई केँ बचाबऽ लेल सरकार लाखों करोड़ रुपयाक सहायता देलक। ओ बतौलनि जे छोटका उद्योगसभक विकासक लेल एमएसएमईक परिभाषा सेहो बदलि गेल अछि ताकि जखनि-जखनि ओ सभ आगूक दिसि बढ़थिन, सरकारी सहयोग बनल रहत।
प्रधानमंत्री मुद्रा योजनाक उपलब्धिक उल्लेख कएलनि आ कहलनि जे पाछाक दस वर्षमे एहि योजनाक अंतर्गत बिना कोनो गारंटीकेँ 33 लाख करोड़ रुपैयाक ऋण देल गेल अछि। ओ अपन बात पर विशेष जोर देलनि जे एहिमे सँ 50 प्रतिशतसँ बेसी लाभार्थी एससी, एसटी आ ओबीसी वर्गक छथि। ओ कहलनि जे सरकारक कोशिश एहेन अछि जे छोटका उद्योग देशक युवा लोकनिक पैघ सपना सबकेँ पूरा करबाक माध्यम बनय।
प्रधानमंत्री मोदी कहलनि जे औद्योगिक आ ऊर्जा क्षेत्रमे सरकारक ई प्रयास आत्मनिर्भर भारतक नींवकेँ आओर मजबूत बना रहल अछि।
