कुवैतमे लागल आगिमे मारल गेल भारतीयक शव शुक्रदिन वापिस आनल गेल। जखन मृतकक शव कोच्चि हवाई अड्डा पहुँचल तखन ओतय वातावरण उदास भऽ गेल।
ई ब्लैक फ्राइडे छल जे हवाई अड्डा पर पहिने कहियो नहिं देखल गेल छल।
हवाई अड्डाक एकटा अधिकारी कहलनि, “शुक्रदिन हवाई अड्डा पर सभ गोटे शोकमे छलाह आ सबहक आँखिसँ नोर छल। एहिसँ पहिने कहियो नहिं भेल छल जे एके संग एतेक शव आयल होय। ई असहनीय अछि।”
भारतीय विमानपत्तन प्राधिकरणक एकटा शीर्ष अधिकारी कहलनि, “चूँकि एहि शवसभकेँ कार्गो मानल जाइत अछि, तेँ हम भोरे-भोर विभिन्न विभागक सभ हितधारकसभक बैसार कयलहुँ। हम लगभग १५ सँ २० मिनटमे शव केर हटाबय केर फैसला कयलहुँ। ४५ शवक लेल सीमा शुल्क, प्रवास आ स्वास्थ्य स्वीकृति जल्दिये देल जायत आ ओहिमेसँ ३१ केँ एतय सौंपल जायत। एकटा विशेष क्षेत्र निर्धारित कयल गेल छल, जतय श्रद्धांजलि देबाक लेल ३१टा शव राखल गेल छल। प्रत्येक शवकेँ सम्बन्धित घर धरि पहुँचेबाक लेल एम्बुलेंस उपलब्ध करायल गेल छल।” भारतीय वायुसेनाक एकटा विशेष विमान शेष शवकेँ लऽ कऽ दिल्ली लेल प्रस्थान कयलक।
जहिना विमान कोच्चि हवाई अड्डा पहुँचल, ओतय लोकक चित्कार उठल। माता-पिता, बच्चा, पति-पत्नी आ अन्य रिश्तेदार भावुक भऽ गेलाह।
कुवैतमे ओही कम्पनीमे काज करैवला एकटा पिता अपनाकेँ नियंत्रित नहिं कऽ सकलाह, ओ कानैत कहलनि जे सेवानिवृत्त भेलाक बाद ओ अपन बेटाकेँ ओही कम्पनीमे पठौलनि।
“हमर बेटा अन्तिम बेर जनवरीमे सासुक निधनक बाद एतय आयल छल आ आब हम ओकर शव लेबय लेल आयल छी।”
कोट्टायमक पंपडीक रहनिहार २९ वर्षीय स्टेफिन अब्राहम इंजीनियर छलाह आ पिछला छह सालसँ कुवैतमे काज कऽ रहल छलाह।
हुनक संबंधी भावुक होइत कहलक “हुनक नवका घर लगभग तैयार अछि, ओ सभ किछु मास पहिने अपन घरकेँ अन्तिम रूप देबाक लेल एतय आयल छलाह। हम एकरा बर्दाश्त नहिं कए पाबि रहल छी। इएह जिंदगी अछि।”
केरलक मुख्यमंत्री पिनाराई विजयन सेहो कोच्चि हवाई अड्डापर उपस्थित छलाह, आ ओ सेहो ३१ गोट शव लेबाक प्रतीक्षा कऽ रहल छलाह।
नवनियुक्त केन्द्रीय मंत्री सुरेश गोपी, नेता प्रतिपक्ष वी.डी. सतीसन, राज्यक केबिनेट मंत्री आ सैकड़ामे आम लोक उपस्थित छल।
