दिल्लीक मुख्यमंत्री अरविन्द केजरीवाल रविदिन तिहाड़ जेलसँ जमानत पर रिहा भेलाक बाद पहिल बेर पार्टीक विधायकसभसँ अपन सरकारी आवास पर भेंट कयलनि। बैसारमे ओ केन्द्रमे सत्तारूढ़ भारतीय जनता पार्टीपर प्रहार कयलनि आ कहलनि जे दिल्ली आ पंजाबक सरकारकेँ गिरयबाक ओकर षड्यंत्र बुरी तरहेँ विफल रहल अछि।
आम आदमी पार्टीक विधायकसभकेँ सम्बोधित करैत सीएम केजरीवाल कहलनि जे ओ दिल्ली सरकारकेँ नहिं गिरा सकैत छथि। ओ सभ हमर विधायककेँ तोड़ि नहिं सकलाह। ओ सभ पंजाब सरकारकेँ खरोंच पर्यंत नहिं दऽ सकलाह। पूरा योजना असफल भेल।
ओ कहलनि जे तिहाड़ जेलमे रहैत सेहो ओ जेल कर्मचारी आ सुरक्षा गार्डसँ जानकारी लैत छलाह। ओ सभ हुनका सभटा विधायकक बारेमे बतबैत रहैत छल। ओ कहलनि जे हुनक अनुपस्थितिमे विधायक लोकनि नीक काज कयलनि।
मुख्यमंत्री कहलनि जे हुनक पत्नी सुनीता केजरीवाल, दिल्लीक मंत्री सौरभ भारद्वाज आ आतिशी, एवं पंजाबक मुख्यमंत्री भगवंत मान जेलमे हुनकासँ भेँट करैत रहैत छलाह। ओ हुनका सभसँ दिल्लीमे चलि रहल विभिन्न काजक विषयमे पूछैत रहैत छलाह।
केजरीवाल कहलनि, “हमर गिरफ्तारीसँ पहिने भाजपाक सदस्य हमरासँ भेंट करैत छलाह। ओ लोकनि हमरा कहलनि जे हमर गिरफ्तारीक बाद ओ सभ हमर पार्टीकेँ तोड़ि देताह, दिल्ली सरकारकेँ उखाड़ि देताह आ कोनो तरहेँ आम आदमी पार्टीक विधायक आ भगवंत मानकेँ अपन पक्षमे शामिल कऽ लेताह। मुदा वास्तवमे एकर विपरीत भेल। हमर गिरफ्तारीक बाद हमर पार्टी पहिनेसँ बेसी मजबूतीसँ एकजुट रहल।
ओ विधायकसभसँ कहलनि जे हुनका २ जूनकेँ फेरसँ जेल जाय पड़त। एहि दौरान विधायकसभकेँ पार्टीक देखभाल करय पड़त।
दिल्ली शराब घोटालामे ४० दिनक हिरासतमे रहलाक बाद सुप्रीम कोर्ट शुक्रदिन सीएम केजरीवालकेँ १ जून धरि जमानत देलक अछि।
