सूर्या अस्पतालक निदेशक डॉ. विजय शंकर भाजपाक प्राथमिक सदस्यतासँ इस्तीफा दऽ कऽ जनसूराजसँ जुड़ि गेलाह। डॉ. विजय शंकर भाजपाक जिला समितिमे उपाध्यक्ष पद पर छलाह। भाजपाक प्रदेश महासचिव सह क्षेत्रीय प्रभारी मिथिलेश तिवारीकेँ भेजल गेल अपन इस्तीफा पत्रमे ओ कहलनि जे हम अपन प्राथमिक सदस्यता आ जिला उपाध्यक्ष पदसँ इस्तीफा दैत छी। इस्तीफा पत्रक प्रति भाजपाक राष्ट्रीय अध्यक्ष, प्रदेश अध्यक्ष आ जिला अध्यक्षकेँ सेहो भेजल गेल अछि।
एहि ठाम भाजपासँ संबंध तोड़ैत डॉ. विजय शंकर जनसुराजसँ जुड़ि गेलाह। जनसुराजमे संविधान सभाक सहरसा जिलाध्यक्ष पद पर नामांकित कयल गेल छथि। हुनकर नामांकनक बाद बुधदिन सूर्या अस्पतालक सभागारमे संविधान सभाक महत्वपूर्ण बैसार भेल, जाहिमे मुख्य रूपसँ जनसुराजक संविधानसभाक प्रदेश संयोजक पूर्व आईपीएस अधिकारी आरके मिश्रा, डॉ. विजय शंकरकेँ जन सुराजमे आगमनक स्वागत करैत संविधान सभाक गठन पर प्रकाश डालैत एकर उपयोगिताक बारेमे बतौलनि।
जनसुराजक संस्थापक प्रशांत किशोरक कहब छनि जे सही लोक, सही सोच आओर सामूहिक प्रयाससँ बिहारमे सुंदर जन शासन स्थापित भऽ सकैत अछि। जनसुराजक नीक सोच आ सही प्रयास मात्रसँ संस्था आगू बढ़त।
पूर्व विधायक किशोर कुमार मुन्ना सेहो डॉ विजय शंकरकेँ जनसुराजमे अयला पर स्वागत करैत कहलनि जे नीक लोकक आगमनेसँ संस्था बेसी ऊंचाई पर पहुंचत। प्रदेश संयोजक आरके मिश्रा कहलनि जे, जनसुराज केर २ अक्टूबरकेँ पार्टी घोषित कएल जाएत। जकर तैयारी एखनहिसँ शुरू भेल अछि। बैठकमे नवल किशोर सिंह सहित बहुत रास प्रमुख कार्यकर्ता उपस्थित छलाह।
