शुक्रकेँ राजग गठबंधनक पांचो दलक नेता जेडीयू कार्यालयमे संयुक्त संवाददाता सम्मेलन कयलनि। एहि दौरान भाजपाक प्रदेश अध्यक्ष दिलीप जायसवाल बहुत किछु कहलनि।
एक दिसि विपक्षी नेता तेजस्वी यादव नीतीश सरकार पर हमला कऽ रहल छथि, तऽ दोसर दिसि भाजपा मुख्यमंत्रीमे भगवानकेँ देखैत अछि। शुक्र दिन (20 फरवरी) एकटा प्रेस कॉन्फ्रेंसक दौरान बिहार भाजपाक प्रदेश अध्यक्ष दिलीप जायसवाल कहलनि कि नीतीश कुमारमे दैवीय शक्ति आबि गेल अछि। मुख्यमंत्री जाहि तरहें प्रगति यात्रामे काज कऽ रहल छथि ओकर मतलब ई कहल जा सकैत अछि कि जे सोचल से भेटल।
दिलीप जायसवाल कहलनि, कियो ई कल्पनो नहिं कऽ सकैत छल जे बिहारमे 40 मेडिकल कॉलेज बनि जाएत, ई कोनो छोट-छिन बात नहि अछि। लगैत अछि जे नीतीश कुमारमे किछु दैवीय शक्ति आबि गेल अछि। ओ बिहारकेँ विकसित बिहार बनेबाक प्रगति यात्रामे दृढ़ इच्छाशक्ति देखौलनि अछि।
भाजपा नेता नीतीश कुमारक विषयमे आगू कहलनि जे हम हुनका एकटा राजनीतिक दलक प्रमुख होयबाक अतिरिक्त एकटा व्यक्तिक रूपमे देखि सेहो चकित छी। ओ कहलनि कि जे कियो नीक काज कऽ सकैत अछि ओकर भीतर दिव्य शक्ति होइत अछि, हमरा तऽ इएह अनुभव भेल अछि।
तेजस्वी यादव द्वारा प्रगति यात्राकेँ पतनक यात्रा कहैत दिलीप जयसवाल कहलनि जे तेजस्वी यादव सही छथि। तेजस्वी यादव मात्र बिहारमे गिरावट आनय चाहैत छथि। एकटा एहेन व्यक्ति जकर पूरा परिवार बिहारक पतनक लेल जिम्मेदार अछि, ओकरा तऽ मात्र दुर्गतिये देखाओत। वैऽह देखाई देतै जेहेन सोच रखतै। तेजस्वी यादवक अनुसार वैऽह अछि।
वास्तवमे शुक्रदिन एनडीए गठबंधनक पांचो दलक नेता जेडीयू कार्यालयमे संयुक्त प्रेस कॉन्फ्रेंस कयलनि। घोषणा कयल गेल जे १५ जनवरीसँ बिहारक सभ जिलामे एनडीए गठबंधनक सामूहिक कार्यकर्ता सम्मेलन आयोजित कयल जा रहल अछि। एखन धरि चारि चरण पूरा भऽ चुकल अछि। पाँचम चरण 27 फरवरीसँ शुरू होमय जा रहल अछि। 27 फरवरीकेँ समस्तीपुरमे, 1 मार्चकेँ मधेपुरामे, 9 मार्चकेँ शेखपुरामे, 22 मार्चकेँ मुंगेरमे, 23 मार्चकेँ पूर्णियामे, 23 मार्चकेँ कटिहारमे, 29 मार्चकेँ भागलपुरमे, 29 मार्चकेँ नवगछियामे आ 30 मार्चकेँ बांकामे एनडीए केर कार्यकर्ता सम्मलेन होएत।
