लोकसभा चुनावक पहिल चरणक चुनावसँ एक दिन पहिने कांग्रेस नेता राहुल गांधी बृहस्पतिकेँ पार्टी कार्यकर्तासभसँ कहलनि जे ई कोनो साधारण चुनाव नहिं बल्कि संविधानकेँ बचाबय लेल अछि, आर हुनका सभकेँ लोककेँ ई बताबय लेल प्रेरित करय कहलनि जे “भाजपा भारतक विचारकेँ नष्ट कऽ रहल अछि”।
एकटा वीडियो सन्देशमे राहुल गांधी कांग्रेस कार्यकर्तासभसँ कहलनि जे हुनकर बहुत पैघ जिम्मेदारी अछि। राहुल हिन्दी आ अंग्रेजी दुनू भाषामे अपन सन्देशमे कहलनि, “अहाँ हमर पार्टीक रीढ़ छी। हम सोचलहुं जे चुनावक समय अछि, हमरा अहाँसँ सीधा बात करबाक चाही। ई कोनो साधारण चुनाव नहिं अछि, ई संविधान आ लोकतंत्रकेँ बचाबय केर चुनाव अछि जाहिमे अहां सन ‘बब्बर शेर’ कार्यकर्ताक बहुत पैघ जिम्मेदारी अछि।”
ओ कहलनि “एकर कारण ई अछि जे कांग्रेस पार्टीक सोच आ विचारधारा अहाँमे समाहित अछि, ई अहाँक रग-रगमे अछि। भाजपा-आरएसएस भारतक विचारक विरुद्ध अछि।
ओ आरोप लगओलनि जे ओ सभ हमर संविधान, देशक लोकतांत्रिक संरचना, चुनाव आयोग सहित हमर संस्थानक सङ्ग-सङ्ग भारतक कानूनी व्यवस्थापर हमला कऽ रहल छथि।”
आगू कहलनि “अहाँसभ आरएसएसक विचारधाराक विरुद्ध सड़क पर, गाममे आ सभ ठाम लड़ैत छी। अहां रक्षक छी।”
राहुल गाँधी जोर दऽ कहलनि कांग्रेस भाजपा आ ओकर विचारधाराकेँ पराजित करय जा रहल अछि। ओ कांग्रेस कार्यकर्तासभसँ कहलनि जे जनमानसकेँ बताउ जे भाजपा भारतपर हमला कऽ रहल अछि आ “भारतक विचार”क सङ्ग-सङ्ग संविधानकेँ सेहो नष्ट कऽ रहल अछि।”
लोकसभा चुनावक लेल कांग्रेसक घोषणापत्रकेँ उत्कृष्ट बतौलनि, राहुल गाँधी पार्टीक गारंटीकेँ सूचीबद्ध कयलनि जेना प्रत्येक गरीब परिवारक एकटा महिलाकेँ सालाना १ लाख टाका देब, प्रशिक्षुताक अधिकार, किसानसभक लेल न्यूनतम समर्थन मूल्य (एमएसपी)क कानूनी गारंटी, ठेका श्रमिककेँ समाप्त करब, ३० लाख सरकारी नौकरी देब। अग्निवीर योजनाकेँ समाप्त करब आ वस्तु एवं सेवा कर (जीएसटी) प्रणाली तय करब।
राहुल कहलनि “हम लोकक बात सुनि ई घोषणा पत्र तैयार कयलहुं। अहां देशक जनताकेँ एकरा बारेमे बताउ। अहाँ २०२४ केर लोकसभा चुनावक लेल भारतक जनताक प्रमुख विचारकेँ अपन घोषणापत्रमे अनबामे हमर सहायता कयलहुँ। हम अहां पर भरोसा करैत छी आ हम अहांकेँ प्यार करैत छी। हम अहांकेँ अपन शुभकामना भेजैत छी।”
कांग्रेस ५ अप्रैलकेँ लोकसभा चुनावक लेल ‘न्याय पत्र’ नामक अपन ४५ पृष्ठक घोषणापत्र जारी कयलक।
कांग्रेस महासचिव जयराम रमेश एक्स पर कार्यकर्ता सभकेँ राहुल गांधीक वीडियो संदेशकेँ टैग करैत कहलनि, “लोकसभा चुनावक पहिल चरणसँ एक दिन पहिने राहुल गाँधीक ई वीडियो संदेश देखू। जमीनी स्तरसँ आबि रहल प्रतिक्रियासँ पता चलैत अछि जे देशमे सब जगह कांग्रेस कार्यकर्ता एहि चुनावकेँ लऽकऽ बहुत उत्साहित छथि।”
ओ कहलनि, “मोदी सरकार जायब निश्चित अछि, आब हम सभ मात्र ४ जूनक प्रतीक्षा कऽ रहल छी।” १९ अप्रैलसँ १ जून धरि सात चरणमे होबयवला लोकसभा चुनावक गिनती ४ जूनकेँ कयल जायत।
