दरभंगामे बिहार सरकारक पूर्व मंत्री आ पुर्णिया जिलाक बनमनखीक विधायक कृष्ण कुमार ऋषिक गाड़ी एकटा ट्रकमे जोरदार धक्का मारलक। दुर्घटनाक समय विधायक गाड़ीमे छलाह। जाहि कारणेँ हुनका माथ आ टांगमे गम्भीर चोट लागल अछि। घटनाक बाद लोकसभ हुनका आनन फाननमे लगक अस्पतालमे भर्ती करा देलनि। जतए हुनकर इलाज जारी अछि।
जानकारीक अनुसार बनमनखी विधायक आ विधानसभाक सचेतक कृष्ण कुमार ऋषि पटनासँ घुरैत काल सड़क दुर्घटनामे घायल भऽ गेलाह। ई घटना दरभंगाक दिल्ली मोड़ लग भेल। भाजपा विधायक भोरे लगभग ११ बजे अपन सरकारी गाड़ीसँ पटनासँ निकललाह। विधायकक दरभंगासँ पूरब दिल्ली मोड़सँ आगू-आगू चलि रहल ट्रक अचानक रुकि गेल। तकर बाद विधायकक गाड़ी ट्रकसँ टकरा गेल। एहि घटनामे विधायकक मुँह आ घुटना पर गम्भीर चोट लागल। हुनका दरभंगाक एकटा निजी अस्पतालमे भर्ती कयल गेल अछि, जतय स्थानीय प्रशासनक अधिकारी पहुँचल छथि।
