नीतीश कुमारक अगुवाईमे बिहार सरकार सवर्ण सभक विकास हेतु एकटा आयोगक गठन कएलक अछि। उच्च जाति सभक विकास हेतु बनल एहि आयोगक अध्यक्ष वरिष्ठ भाजपा नेता महाचंद्र प्रसाद सिंह बनलथि, जखनकि जेडीयू केर राष्ट्रीय प्रवक्ता आ वरिष्ठ नेता राजीव रंजन प्रसादकेँ उपाध्यक्ष बनाओल गेल अछि। दयानंद राय, जय कृष्ण झा, राजकुमार सिंहकेँ सदस्य बनाओल गेल अछि।
एही आयोगमे एकटा अध्यक्ष, एकटा उपाध्यक्ष आ तीनटा सदस्य होयत। सामान्य प्रशासन विभागक दिसिसँ एहि संबंधमे अधिसूचना जारी कयल गेल अछि। जेडीयू प्रवक्ता राजीव रंजन प्रसादकेँ उच्च जाति आयोगक उपाध्यक्ष बनाओल गेल अछि। ओतय दयानंद राय, जय कृष्ण झा आ राजकुमार सिंहकेँ सदस्य नियुक्त कयल गेल अछि। अध्यक्ष-उपाध्यक्ष आ सदस्यक कार्यकाल 3 वर्षक होयत।
संगहि संग राज्य अनुसूचित जनजाति आयोगमे सेहो महत्वपूर्ण बदलाव भेल अछि। पश्चिम चंपारणक शैलेंद्र कुमारकेँ आयोगक नव अध्यक्ष नियुक्त कयल गेल अछि। हुनका संग सुरेंद्र उरांव उपाध्यक्ष, प्रेमलीला गुप्ता, तल्लू बास्के आ राजू कुमारकेँ सदस्य बनाओल गेल अछि। एहि आयोगक कार्यकाल सेहो तीन वर्षक होयत।
ई घोषणा जेडीयूक गुलाम रसूलकेँ राज्यक अल्पसंख्यक आयोगक प्रमुख नियुक्त होयबाक एक दिन बाद भेल अछि। जनतब जे बृहस्पतिकेँ नीतीश कुमारक सरकार राज्यमे अल्पसंख्यक आयोगक पुनर्गठन कयलक। अल्पसंख्यक आयोगक चेयरमैन गुलाम रसूल बनल छथि। आयोगमे 10टा अन्य सदस्य सेहो बनल अछि। गुलाम रसूल पार्टीक सीनियर नेता छथि आ पूर्वमे सांसद सेहो रहल छथि। बिहारमे एहि साल विधानसभा चुनाव होबय वला अछि। राज्यमे राजनीतिक माहौल पहिनहिसँ गरम भऽ गेल अछि। मुख्यमंत्री नीतीश कुमार सत्तामे बनल रहबाक लेल कोनो कसरि नहि छोड़ि रहल छथि।
