डिफेंस कॉलोनी निवासी भाजपा जिला स्तरीय नेता राजेश कुमार सिंह दानापुर थानामे लिखित शिकायत दर्ज करबैत आशंका जतौलनि अछि जे हुनकर बेटाक अपहरण भऽ गेल अछि। ओ बतौलनि अछि जे शनि (२२ जून) राति लगभग ८:०० बजे हुनक बेटा कहलक जे किछु लड़का हमरासभकेँ अपहरण कऽ दानापुरक एकटा भवनमे राखि देलक अछि। भाजपा नेता अपन बेटाक संग किछु अप्रिय होयबाक आशंका सेहो व्यक्त कयलनि अछि।
लापता बच्चाक पिता राजेश कुमार सिंह बतौलनि जे ओ आइ भोरे दानापुर थानामे एहि संबंधमे लिखित शिकायत देलनि अछि। लड़काक पिता कहलनि जे हुनकर बेटा आशु बी फार्मा परीक्षा देबाक लेल अपन घरसँ निकलल छल, जकर बाद ओ नहिं घुरल। बेटाक घर नहिं घुरलाक बाद खोज शुरू कयल गेल, मुदा कोनो निशान नहिं भेटल। २२ जूनक देर साँझ आशु अपन मायक मोबाइल पर फोन कऽ अपहरणक सूचना देलक। हमसभ एहि घटनासँ आक्रोशित छी। भाजपा कार्यकर्ताक संग राजदक सेहो किछु कार्यकर्ता बीबीगंज मोड़ लग दानापुर गांधी मैदान रोड केर अवरुद्ध कए हंगामा कऽ रहल छलथि। पुलिस पर लापरवाहीक आरोप सेहो अछि।
संगहि पुलिसक कहब अछि जे कोनो लेनदेनक मामिला बुझाइत अछि। जांच कएल जा रहल अछि। दानापुरक एएसपी दीक्षा कहलनि जे दानापुर थानाकेँ लापता बच्चाक सूचना भेटल अछि। जखनि माता-पिताकेँ व्हाट्सएपक माध्यमसँ फोन आयल तखन बच्चा कहलक जे ओ एकरा कोठरीमे बंद कय रखने अछि। पुलिस जांचमे लागल अछि, कोनो लेनदेनक मामिला बुझाइत अछि। बच्चाक खोज कएल जाए रहल अछि। बहुत जल्द ताकि लेल जाएत।
