समाजवादी पार्टीक राष्ट्रीय अध्यक्ष अखिलेश यादव भाजपामे चलि रहल घटनाक्रम पर कटाक्ष कयलनि। ओ कहलनि जे भाजपा आन्तरिक झगड़ाक दलदलमे धंसि रहल अछि।
अखिलेश यादव एक्स पोस्टमे लिखलनि जे “भाजपाक कुर्सीक लड़ाईक गर्मीमे उत्तर प्रदेशमे शासन आ प्रशासन ठंढ़ा बस्तामे चलि गेल अछि। तोड़फोड़क राजनीतिक जे काज भाजपा आन दल मे करैत छल, आब ओ अपन पार्टीक भीतर वैऽह काज कऽ रहल अछि, तेँ भाजपा आंतरिक झगड़ाक दलदलमे धंसि रहल अछि। भाजपामे कोनो एहेन नहिं अछि जे जनताक बारेमे सोचत।”
हालहिमे लखनऊमे आयोजित भाजपा राज्य कार्य समितिमे उत्तर प्रदेशक उपमुख्यमंत्री केशव प्रसाद मौर्यक एकटा वक्तव्य यूपीक राजनीतिमे उथल-पुथल उत्पन्न कयलक। ओ अपन वक्तव्यमे कहलनि जे “सङ्गठन सरकारसँ पैघ अछि, सङ्गठनसँ पैघ कियो नहिं अछि। हर एक कार्यकर्ता हमर गौरव अछि।”
हुनक बयानक बाद भाजपाक राष्ट्रीय अध्यक्ष जेपी नड्डा मंगलदिन सरकार आ संगठन दुनूक प्रतिनिधिकेँ बजौलनि। जेपी नड्डा केशव प्रसाद मौर्य आ प्रदेश अध्यक्ष भूपेन्द्र चौधरीसँ अलग-अलग भेंट कयलनि। कहल जा रहल अछि जे जेपी नड्डा एहि बैसारमे आगामी उपचुनावक बारेमे मंथन कयलनि अछि। सङ्गठनकेँ सुदृढ़ करबाक अतिरिक्त, कार्यकर्ता सभक समस्या आ जातिमे विभाजित मतदातासभकेँ एकजुट करबाक योजनापर सेहो चर्चा कयल गेल अछि।
उत्तर प्रदेश भाजपाक दूटा पैघ नेता केशव प्रसाद मौर्य आ भूपेन्द्र चौधरीकेँ अचानक दिल्ली बजेलाक बाद अटकलबाजी गर्म भऽ गेल। लोकसभा चुनावमे निराशाजनक प्रदर्शनक बाद १० विधानसभा सीटक उपचुनाव भाजपाक लेल बहुत महत्वपूर्ण अछि। पार्टीक भीतर एहेन बयानबाजीक कारण भाजपा अपन विपक्षकेँ कोनो मौका नहिं देबय चाहैत अछि।
सूत्रक अनुसार, भाजपा आलाकमान दुनू नेताकेँ सरकार आ संगठनक बीच समन्वय स्थापित करबाक आ अनावश्यक बयानकेँ समाप्त करबाक निर्देश देलक अछि।
