प्रधानमंत्री नरेन्द्र मोदी सोमदिन गढ़वामे एकटा चुनावी जनसभाकेँ सम्बोधित कयलनि। एहि दौरान ओ हेमंत सोरेन सरकार पर आदिवासी राज्यक विकासमे बाधा उत्पन्न करबाक आरोप लगओलनि। रैलीकेँ सम्बोधित करैत प्रधानमंत्री मोदी कहलनि जे आगामी चुनाव झामुमो सरकारकेँ सत्तासँ बेदखल कऽ देतन आ राज्यमे भाजपा सरकार बनायत। ओ पार्टी कार्यकर्ता आ स्वयंसेवकसभसँ आग्रह कयलनि जे बूथ स्तर धरि पार्टीकेँ सशक्त बनयबाक लेल आ विधानसभा चुनावमे भाजपाकेँ विजयी बनयबाक लेल कठोर परिश्रम करथि।
प्रधानमंत्री मोदी कहलनि जे आइ पूरा राज्यमे एकटा नारा गूंजि रहल अछि – ‘रोटी, बेटी आ माटीक पुकार’। अगिला दू दशककेँ राज्यक सङ्ग-सङ्ग देशक लेल सेहो महत्वपूर्ण बतौलनि, प्रधानमंत्री मोदी कहलनि जे विकसित भारतक लक्ष्यकेँ साकार करबामे राज्य महत्वपूर्ण भूमिका निभाओत।
झारखण्डक विकासक प्रति भाजपाक प्रतिबद्धता पर प्रकाश दैत मोदी कहलनि, “भाजपा सरकार झारखण्डकेँ तीव्र विकासक पथ पर आनय आ ओकर लोकक समृद्धि सुनिश्चित करबाक लेल एकटा अलग राज्यक आधारशिला रखलक।” ओ आगू कहलनि जे हेमंत सरकार विकासक पथमे बाधा उत्पन्न कऽ रहल अछि।
प्रधानमंत्री मोदी झारखण्डक लेल भाजपाक घोषणापत्रक सेहो प्रशंसा कयलनि आ कहलनि जे महिला निवासीसभक कल्याण आ सुरक्षा पार्टीक सर्वोच्च प्राथमिकता अछि।
झारखण्डक लेल भाजपाक प्रस्तावित योजना जेना गोगो दीदी योजना (महिलाक लेल २१०० रुपया मासिक) आ ५०० रुपैयामे गैस सिलिण्डरक चर्चा करैत पीएम मोदी कहलनि जे ई केन्द्रक प्रमुख उज्ज्वला योजना जकाँ राज्यक महिलासभकेँ सशक्त बनओत।
ओ इंडी गठबंधनमे शामिल राजनीतिक दलसभकेँ सेहो निशाना बनओलनि। प्रधानमंत्री मोदी हुनका पर झूठा वादा कऽ लोककेँ धोखा देबाक आरोप लगओलनि। ओ कहलनि जे जतय भाजपाक अपन गारंटी पूरा करबाक ट्रैक रिकॉर्ड अछि, ओतहि झामुमो, कांग्रेस आ आन झूठ्ठा लोकक एकटा समूह अछि जे झूठ वादा कऽ लोककेँ मूर्ख बना रहल अछि।
ओ आगू कहलनि जे विपक्ष बहुत रास योजनाक घोषणा कऽ सकैत अछि, मुदा ई भाजपा सरकारक ईमानदारी आ सत्यनिष्ठाक बराबरी नहि कऽ सकैत अछि। प्रधानमंत्री मोदी झारखण्डक जनताकेँ छठिक शुभकामना सेहो देलनि।
