राष्ट्रपति शासनक स्थितिमे राज्यक निर्वाचित सरकारकेँ भंग वा निलंबित कयल जाइत अछि। तकर बाद राज्यक प्रशासन केंद्र सरकारक अधीन आबि जाइत अछि। बंगालमे सेहो आब राष्ट्रपति शासनक मांग उठल अछि।
मुर्शिदाबादक हिंसा आ सम्पूर्ण पश्चिम बंगालक स्थिति पर बीजेपी ओहि ठाम राष्ट्रपति शासन लागू करबाक मांग कएलक अछि। बीजेपी नेताक कहब अछि जे वक्फ एक्टक विरोधक नाम पर जिहादी द्वारा ओहि ठाम हिंसा कयल जा रहल अछि। हिन्दु पर अत्याचार भऽ रहल अछि आ राष्ट्र विरोधी ताकतकेँ खुल्ला छुट देल गेल अछि। पश्चिम बंगाल पूरा जरि रहल अछि। सरकार आ प्रशासन परिस्थितिकेँ संभारयमे पूरा नाकाम अछि। एहेनमे ओहि ठाम राष्ट्रपति शासन लागू होयबाक चाही। बीजेपी नेताक एहि मांगक बाद विपक्ष बीजेपी पर हमलावर अछि।
बंगालमे राष्ट्रपति शासन लगबयक मांग पर पूर्णियासँ निर्दलीय सांसद पप्पू यादव पैघ बयान देलनि अछि। ओ कहलनि, “भाजपा भारतमे कखनहुँ असगर चुनाव नहि जीति पाबैत अछि। ई ककरो कंधा पर बंदूक राखि जीतैत अछि। भाजपा ककरो सँगहि जीत पाबैत अछि आ ओकरा हटाँ कऽ अपन सरकार बना पाबैत अछि। भाजपा जतय सरकार नहि बना पाबैत अछि, ओतय राष्ट्रपति शासनक तहत राज करय चाहैत अछि। एहि जन्ममे भाजपा बंगालमे जीत नहि सकैत अछि, ताहि लेल आब ई पाछू दरवाजासँ बंगालमे राज करय चाहैत अछि।”
