प्रधानमंत्री नरेन्द्र मोदी बुधदिन नई दिल्लीमे भारतक प्रधान न्यायाधीश डीवाई चन्द्रचूड़क निवास पर गणपति पूजा समारोहमे भाग लेलनि। एहि बात पर देशक राजनीतिक माहौल गर्म भऽ गेल अछि। विपक्षी दल भारतक प्रधान न्यायाधीश डीवाई चन्द्रचूड़क सङ्ग पीएम मोदीक भेंटक आलोचना कयलक, जाहिपर भाजपा जवाब देलक जे ई मुद्दा भेंटक नहिं बल्कि गणपति पूजाक अछि।
भाजपाक राष्ट्रीय प्रवक्ता संबित पात्रा पार्टी मुख्यालयमे मीडियासँ गप्प करैत विपक्षी दलसभकेँ यूपीए सरकारक कार्यकालमे आयोजित इफ्तार पार्टीक स्मरण करओलनि। ओ कहलनि जे सर्वोच्च न्यायालयक मुख्य न्यायाधीश महाराष्ट्रसँ अबैत छथि आ ओ अपन घरमे गणपति पूजन कार्यक्रमक आयोजन कयलनि आ स्वाभाविक रूपसँ ओ कतेको लोककेँ आमंत्रित कयने हेताह।
संबित पात्रा पीएम मोदी आ सर्वोच्च न्यायालयक मुख्य न्यायाधीशक बीच भेँटक आलोचना करयवलापर पलटवार करैत कहलनि जे एतय मुद्दा ई भेंटक नहिं अपितु गणपति पूजाक अछि। यूपीए सरकारक समयमे मनमोहन सिंह इफ्तार पार्टीक मेजबानी करैत छलाह, की सर्वोच्च न्यायालयक तत्कालीन मुख्य न्यायाधीश ओहिमे नहिं जाइत छलथि, की दुनू गोटे ओहि समय भेँट नहिं कयलनि, की दुनू गोटे एके टेबुल पर बैसि गप्प नहिं कयलनि ?
ओ गणपति पूजाक विषयमे राजनीति करबाक आरोप लगबैत कहलनि जे प्रधानमंत्री मोदी भारतक प्रधान न्यायाधीशक आमंत्रण पर हुनक निवास पर गणपतिक पूजा कयलनि, मुदा किछु लोक एहि विषयमे राजनीति सेहो कऽ रहल छथि। हुनका सभकेँ आश्चर्य होइत अछि जे जँ प्रधानमंत्री भारतक प्रधान न्यायाधीशसँ भेंट करैत छथि तखनि एहि पर आपत्ति अछि। मुदा जखनि राहुल गाँधी इल्हान उमरसँ भेँट करैत छथि जे अमेरिकामे भारतक विरोधी आ पीओकेक सङ्ग ठाढ़ होबयवाला अछि, तकर हुनका कोनो आपत्ति नहिं अछि।
ओ कहलनि जे ई लोक गणपतिक पूजा पर राजनीति करबाक प्रयास सेहो कऽ रहल छथि, ई लोक की चाहैत छथि ? की ई लोक चाहैत छथि जे भारतक लोकतंत्रक स्तम्भ आपसमे भेंट-घांट नहिं करथि ? की एकटा आरतीमे भाग लेलासँ समीकरण बदलि जाइत अछि ?
संबित पात्रा कांग्रेस आ राहुल गांधी सहित पूरा विपक्षी गठबंधनक आलोचना करैत कहलनि जे दू दिन पहिने अमेरिकामे एकटा साक्षात्कारक क्रममे राहुल गाँधीसँ पूछल गेल छल जे इंडी गठबंधनमे ए की अछि ? तखनि राहुल गाँधी कने काल सोचैत रहलाह जे ए की अछि, फेर कहलनि जे ए एलायंसक लेल अछि। इंडी एलायंसमे, ए केर अर्थ – अपराध आ अपीजमेंट अछि।
