बिहारसँ गुवाहाटी आयल तीनटा पिस्तौलक संग हथियार तस्कर बंदी

असम समदिया
*

राजकीय रेल पुलिस ( जीआरपी) काल्हि गुवाहाटी रेलवे स्टेशनसँ तीनटा पिस्तौलक संग एकटा युवककेँ गिरफ्तार कयलक अछि। गिरफ्तार आरोपीक पहिचान बिहारक खगड़िया जिलाक मथार निवासी गुल्लू कुमारक रूपमे कयल गेल अछि।

खुफिया जानकारीक आधार पर काल्हि शनिकेँ 12.45 बजे गुवाहाटी रेलवे स्टेशनक फुट ब्रिज पर त्वरित कारवाईमे हथियार तस्कर गुल्लू कुमारकेँ बंदी बनाओल गेल।

जीआरपी तस्कर लगसँ तीनटा 7.65 एमएम पिस्तौल आ छहटा मैगजीन बरामद कयलक अछि। जीआरपीक प्रारंभिक जांचमे पता चलल जे आरोपी बिहारसँ असम हथियार अनने छल। बताओल जा रहल अछि जे ओ गुवाहाटी स्टेशन पर ककरो दोसरकेँ सौंपबाक लेल इंतजार कऽ रहल छल ।

एहि बरामदगीसँ स्वतंत्रता दिवससँ पहिलने अवैध हथियारक संभावित तस्करीक गंभीर चिंता पैदा भऽ गेल अछि। कारण एहि दौरान राज्य आ देश भरिमे सुरक्षाक इंतजाम कड़ा भऽ जाइत अछि। फिलहाल पुलिस आरोपीसँ पूछताछ कऽ रहल अछि जाहिसँ हथियारक स्रोत आ ओकरा लेबाक लेल आयल व्यक्तिक विषयमे पता लगाओल जा सकय।