हज यात्री देशक 10 अलग-अलग हवाई अड्डासँ हज लेल प्रस्थान करथिन। एयरपोर्ट धरि जायसँ पहिने हज यात्रीकेँ ठहरबाक, भोजन आ आवागमनक सभ सुविधा राज्य सरकार द्वारा प्रदान कयल जायत।
मुख्यमंत्री नीतीश कुमार शनिदिन 1 अण्णे मार्ग स्थित ‘संकल्प’ भवनमें हज-2025 केर तैयारीसँ संबंधित समीक्षा बैठक कयलथि आ अधिकारीगणकेँ आवश्यक निर्देश देलथि। बैठकमे अल्पसंख्यक कल्याण विभागक सचिव मो. सोहैल प्रस्तुतीकरण केर माध्यमसँ हज-2025 केर व्यवस्थाक संबंधमे विस्तृत जानकारी देलथि। एहि दौरान ओ जिलावार हज यात्रीक संख्या, इंबारकेशन प्वाइंट, हज यात्रीकेँ देल जाए वला सुविधाक संबंधमे जानकारी देलथि।
ओ कहलथि कि अल्पसंख्यक कल्याण विभाग, बिहार सरकार द्वारा हज यात्री सभकेँ सभ सुविधा प्रदान करय केर तैयारी कयल जा रहल अछि। एहि वर्ष देशक 10 अलग-अलग हवाई अड्डासँ बिहारक हज यात्री सभकेँ हज यात्रा पर पठाओल जाएत।
विभिन्न स्थान सभ पर बिहारक हज यात्री सभ लेल कएल गेल व्यवस्था केर देखरेख खातिर वरिष्ठ अधिकारी केर अधीन टीमक नियुक्ति कएल गेल अछि। समीक्षाक दौरान मुख्यमंत्री कहलनि जे हज यात्री सभ लेल हज यात्राक दौरान एयरपोर्ट तक जाएसँ पूर्व आवासन, भोजन आ आवागमन केर सभ सुविधा राज्य सरकार द्वारा प्रदान कएल जा रहल अछि। सभ मूलभूत सुविधाक बेहतर व्यवस्था कयल जाए, ताकि हज यात्री सभकेँ कोनो प्रकारक कष्ट नहि होय आ हुनक यात्रा सुगमतापूर्वक सम्पन्न भऽ सकय।
मुख्यमंत्री कहलनि जे अल्पसंख्यक कल्याण विभाग, बिहार सरकार प्रतिवर्ष मुस्लिम धर्मक लोक सभकेँ हज यात्रा लेल हुनक सर्वाधिक प्रमुख धार्मिक स्थल मक्का (सऊदी अरब) लेल पठेबाक व्यवस्था करैत आबि रहल अछि। एहि वर्ष बिहारसँ 1391 पुरुष आ 1012 महिला कुल 2403 हज यात्री मक्का जायत। ई हज यात्री सभ देशक 10 विभिन्न हवाई अड्डासँ हज यात्रा लेल प्रस्थान करत। ई बहुत खुशी केर बात अछि। हज यात्री सभ केर समस्त सुविधाक ध्यान राखल जाएत।
ओ कहलन्हि जे हज भवन, पटना केर समरूप किशनगंजमे बहुउद्देशीय भवन, हज यात्री सभक लेल आवासन, भोजन, पासपोर्ट सत्यापन, टीकाकरण, विदेशी मुद्रा विनिमयण आदिक बेहतर व्यवस्था कयल गेल अछि। एही प्रकारक व्यवस्था सीतामढ़ी, दरभंगा सहित अन्य जिलाक लेल सेहो कराओल जाय।
हज यात्रा शुरू होबयसँ पहिने शुभकामना बैठक (दुआईया मजलिस) हज भवन, पटनामे कयल जाइत अछि। एहि वर्ष ई बैठक हज भवन, पटना स्थित मौलाना मजहरूल हक ऑडिटोरियममे एक मईकेँ प्रस्तावित अछि। समीक्षा बैठकक बाद मुख्यमंत्री हज भवन जाय दुआईया मजलिसक आयोजनक तैयारीक सेहो जायजा लेताह।
