स्कूल शिक्षकक खाली पद पर नियुक्ति लेल 40% बिहारमे मैट्रिक आ इंटरमीडिएट पास कएनिहार बिहार अभ्यर्थी लेल आरक्षित होएत। 35% महिला लेल आरक्षित अछि।
मुख्यमंत्री नीतीश कुमार सोमदिन सोशल मीडिया पर शिक्षक बहालीमे डोमिसाइल नीति लागू करबाक घोषणा कयलनि आ ओकर बाद मंगलदिन राज्य मंत्रिमंडलक बैसारमे डोमिसाइल नीतिकेँ मंजूरी देल गेल।
आब शिक्षक बहालीमे टीआरई-4 वा ओकर बाद बिहार अभ्यर्थी पर 40% डोमिसाइल पॉलिसी लागू होएत, मुदा इ लाभ केवल ओहि लोककेँ भेटत जिनका लग बिहार स्कूलसँ मैट्रिक आ इंटरमीडिएटक सर्टिफिकेट अछि।
पूरा जानकारी दैत कैबिनेट सचिव सह शिक्षा विभागक अपर मुख्य सचिव एस सिद्धार्थ कहलनि जे शिक्षा विभाग द्वारा आइ एकटा महत्वपूर्ण निर्णय लेल गेल अछि, जाहिमे बिहारक शैक्षणिक संस्थानमे मैट्रिक आ इंटरमीडिएट पास करय वला छात्र/छात्राकेँ शिक्षा विभागमे नौकरी देबयमे प्राथमिकता देल जायत।
ई शिक्षा विभागक सेवा शर्त नियमावली 2025 केर तहत कएल गेल अछि। एकर तहत स्कूल शिक्षकक खाली पद पर नियुक्तिक लेल 40% सीट बिहारक अभ्यर्थी लेल आरक्षित होएत जे बिहारमे मैट्रिक आ इंटरमीडिएट पास कयने छथि। ओ कहलनि जे शिक्षकक नियुक्तिमे पहिनेसँ 50% जाति आधारित आरक्षण अछि, आरक्षणक लाभ केवल बिहारक मूल निवासीकेँ भेटैत अछि।
एकर अलावा 10% पहिनेसँ कमजोर आर्थिक स्थिति वला लोकक लेल आरक्षित अछि। ई सेहो बिहारक मूल निवासीक लेल प्रावधान अछि, ताहि लेल कुल 60% पहिनेसँ आरक्षित अछि। एकर संग-संग 100 मे सँ 35% सीट महिला लेल आरक्षित अछि।
