केंद्रीय गृहमंत्री अमित शाह कहलनि जे 1990 सँ 2005 धरि लालूक कार्यकालमे अपराध, छिनतई, बलात्कार केर घटना भऽ रहल छल। ताहि लेल लालू-राबड़ीक सरकारकेँ जंगलराजक नाम देल गेल।
राजधानी पटनामे सहकारिता विभागक कार्यक्रमकेँ संबोधित करैत केंद्रीय गृहमंत्री अमित शाह आरजेडी सुप्रीमो लालू प्रसाद यादव पर हमला कएलनि। एकर संगहि ओ कहलनि जे 2025 केर चुनावमे नरेंद्र मोदी आ नीतीश कुमारक नेतृत्वमे फेरसँ एनडीए केर सरकार बनत आ प्रचंड बहुमतसँ सरकार बनत। अर्थात सीधा तौर पर शाह मुख्यमंत्री पदक लेल नीतीश कुमारक चेहरा पर मुहर लगा देलनि अछि।
कार्यक्रमकेँ संबोधित करैत अमित शाह कहलनि जे बीतल 10 वर्षमे मोदी सरकार देशक 60 करोड़ गरीबक लेल काज कएलक। हम लालू यादवसँ पुछैत छी जे अहां गरीबक लेल किछु कएने होय तँ ओकर डाटा लऽ कऽ आउ। ओ कहलनि जे लालू यादव गरीबक लेल किछु नहि कयलनि। पीएम मोदी गरीबक मददक लेल सहकारिता क्षेत्रमे काज कयलनि।
गृहमंत्री कहलनि जे सहकारिता क्षेत्रमे सबसँ बेसी लाभ बिहारकेँ होबएवला अछि। लालूक शासन कालमे विकास चौपट भऽ गेल। चीनी मिल सभ बन्द भऽ गेल। हम जनतासँ कहय आएल छी जे अहाँ बिहारमे फेरसँ एनडीए केर सरकार बनाउ, हम चीनी मिल सभकेँ फेरसँ शुरू कऽ देब। दलहनक एक-एक दाना एमएसपी पर खरीदल जा रहल अछि। ओ कहलनि जे 1990 सँ 2005 धरि लालूक कार्यकालमे अपराध, छिनतई, बलात्कारक घटना होइत छल। एहि हेतु लालू-राबड़ीक सरकारकेँ जंगलराजक नाम देल गेल।
अमित शाह कहलनि जे हम बेसी नहि बाजब, मुदा लालू यादवसँ एकटा प्रश्न पूछैत छी जे अपने यूपीएमे मंत्री रहला पर अपने केन्द्र सरकारसँ कतेक धन बिहार अनलौं। लालू-राबड़ीक सरकारमे बिहार बर्बाद भेल आ एनडीएक सरकारमे बिहारक विकास भेल अछि। 8000 करोड़सँ पुलक निर्माण भऽ रहल अछि। बिहारमे मखान बोर्ड गठन कएल गेल अछि।
गृहमंत्री द्वारा पटनासँ 4 विभागक 823 करोड़क योजनाक शिलान्यास आ उद्घाटन कएल गेल। पटनाक बाद अमित शाह गोपालगंजक कार्यक्रममे शामिल होयबाक लेल रवाना भऽ गेल छलाह।
