बिहारमे एहि साल होबएवाला विधानसभा चुनावसँ पहिने तेजस्वी यादव एकटा पैघ बयान देलनि अछि। आरजेडी नेता तेजस्वी यादव मंगलकेँ कहलनि जे बिहारमे आरजेडी केर नेतृत्वमे सरकार बनला पर गरीब लोकनिकेँ घर देल जायत।
पूर्व डिप्टी CM कहलनि जे जाहि दिन अहाँक बेटा, भाई तेजस्वी मुख्यमंत्री बनत, ओहि दिन गरीब लोकनिकेँ पक्का मकान देबाक काज कएल जायत।
तेजस्वी यादव आगा कहलनि जे हमर सरकार बनत त’ माई बहिन योजना केर माध्यमसँ महिलाकें ढाई हजार रुपैया प्रति महिना देल जायत। लोकसभकेँ 200 यूनिट फ्री बिजली देल जायत। संगहि वृद्धा पेंशन आ विकलांग पेंशन सेहो बढ़ाओल जायत।
पीएम मोदी पर निशाना साधैत तेजस्वी कहलनि जे नीतीश कुमार हमर अभिभावक छथि। हुनक आयु अधिक भऽ गेल अछि। हमरा चिन्ता भऽ रहल अछि हुनक हाल सब देखि कऽ, कारण पूरा देश जानि रहल अछि।
बीजेपीक आलोचना करैत तेजस्वी कहलथि जे पीएम मोदी 11 वर्षसँ प्रधानमंत्री छथि। जाहि राज्यमे चुनाव होएत ओहिठाम प्रधानमंत्री जयताह। जतय प्रचार करबाक लेल जाइत छथि ओहि राज्यकेँ नंबर वन बना देबाक वादा करैत छथि। चुनावक समय हिन्दू मुस्लिम नाम ल’ क’ जनताकेँ गुमराह कएल जाइत अछि। जनतासँ भाजपा मंदिर आ मस्जिदक नाम पर लड़वा क’ वोट ल’ लेत। हमर सरकार द्वारा जातीय जनगणना बिहारमे कराओल गेल।
ओ कहला कि शराबबंदी कानूनक नाम पर गरीबक शोषण भऽ रहल अछि। बिहारमे जातीय जनगणनाक सर्वेमे मुसहर समाजक लोक 40 लाखसँ ऊपर अछि, मुदा एहि समाजसँ मात्र 20टा लोक डाक्टर छथि आ 76टा इंजीनियर। भाजपा नहि चाहैत अछि जे आरक्षणसँ एहि समाजक लोक विकसीत होइ।
तेजस्वी दावा कएलनि जे लालू प्रसाद यादवक कारण दलित राजनीतिमे आएल छथि। अनुसूचित जाति समाजमे लोकक जतेक संख्या अछि ताहिमे 1.13 पर्सेंट लोक मात्र सरकारी नौकरीमे छथि।आरक्षण जे हमर सरकारमे बढ़ाएल गेल तकरा रोकि देल गेल। एनडीए सरकारमे बड़का-बड़का दलित नेता छथि, मुदा केओ किछु नहि बाजि रहल अछि, सभ चुपचाप अछि। गरीबक लेल स्कूल मंदीर अछि आ शिक्षा असली धर्म अछि, एकरा अंगीकार करबाक जरूरत अछि।
आरजेडी नेता कहलथि जे गाड़ी 15 वर्ष पुरान भऽ जाइत अछि त’ सरकार चलाबय लेल अनुमति नहि दैत अछि। गाड़ी खटारा भ’ जाइत अछि आ ई सरकार 20 वर्ष पुराना भ’ चुकल अछि। आब पुरान सरकारकेँ हटाकऽ नव सरकार बनाकऽ बिहारक विकास तेज गतिसँ करबाक अछि। आब युवाकेँ अवसर भेटबाक चाही। तेजस्वीकेँ 5 वर्षक मौका दिअ, तेजस्वीक उम्र कच्चा अवश्य अछि, मुदा जुबानक पक्का अछि।
आरजेडी नेता तेजस्वी कहलथि जे भाजपा हिन्दू-मुस्लिम कऽ मुख्य मुद्दासँ एहि खातिर भटकाबैत अछि ताकि अहाँ सभ आरक्षण मांगब, जमीन मांगब बिसरि जाइ। बिहारमे अनुसूचित जातिमे जतेक आबादी अछि, ओहि अनुपातमे सरकारी नौकरीमे हुनका स्थान नहि भेटल अछि, आंकड़ा एहि बात केर प्रमाणित करैत अछि।
