कहल जा रहल अछि जे शनि दिन पुलिस टीम पर हमला भेल। दुनू घायल पुलिसकर्मीकेँ सरकारी अस्पतालमे भर्ती करायल गेल अछि। ई मामिला मेसकौर थाना क्षेत्रक पवई गामक अछि।
कहल जा रहल अछि जे सूचनाक आधार पर बालू माफियाक ट्रैक्टर पकड़य लेल गेल पुलिस टीम पर बालू माफिया हमला कयलक। पुलिसकेँ देखि बालू माफिया सभ बालूसँ भरल ट्रैक्टर लऽ घटनास्थलसँ भागय लागल। पुलिस तकरा सभकेँ पकड़य चाहल आ एही दौरान बालू माफिया सभ पुलिस टीम पर हमला कय देलक। जखन थाना प्रभारी रूपेश कुमारकेँ एहि मामिलाक जानकारी भेटल तखन टीमक संग पहुँचि जवाबी कारवाई सेहो कयलनि। थाना प्रभारी रूपेश कुमार बतौलनि जे पुलिस टीम पर हमला करयवला एकटा युवककेँ बंदी बनाओल गेल अछि।
एकटा बाइक आ एकटा ट्रैक्टर सेहो जब्त कयल गेल अछि। हमलावरक पहिचान कएल जा रहल अछि। जल्दिये आन हमलावर सभकेँ सेहो बन्दी बनाओल जाएत। घायल पुलिसकर्मीक पहिचान सिपाही अनुज कुमार दुबे आ सृष्टि सिन्हाक रूपमे भेल अछि।
कहल जाइत अछि जे ढ़ाढ़र नदीक पवई गाममे अवैध रूपसँ बालु खनन कयल जा रहल अछि। एहि सूचनाक आधार पर पुलिसक एकटा टीम पवई गाम पहुँचल। एहि दौरान जखन बालु माफियाक नजरि पुलिस पर पड़ल तखन सभ लोक अपन ट्रैक्टर लऽ कऽ भागय लागल। तखनि पुलिस जवाबी कार्रवाई कयलक आ ट्रैक्टर पकड़बाक प्रयास केलक। मुदा बालू माफिया पुलिस टीम पर हमला कय देलक। कोनो तरहेँ पुलिस अपन जान बचाकऽ भागल। एकर बाद पुलिस थाना प्रभारीकेँ जानकारी देलक। पुलिस प्रभारी एकटा टीम बनौलनि आ बालु माफियाक खिलाफ छापा मारब शुरू कऽ देलनि अछि।
