बिहार विधानसभामे मानसून सत्रक पहिल दिन हंगामा केर भेंट चढ़ि गेल। विधानमंडल मानसून सत्र सोमदिन 21 जुलाईसँ शुरू भऽ गेल अछि, मुदा विधानसभाक कार्यवाही शुरू होइते विपक्ष सदनमे जबरदस्त हंगामा मचा देलक। विधानसभा चुनावसँ पहिने निर्वाचन आयोग द्वारा मतदाता सूची संशोधन आ कानून व्यवस्थाकेँ मुद्दा पर विपक्षी दल हंगामा कयलक।
बिहार विधान सभामे कार्यवाही शुरू होइते हंगामा भेल। विधानसभा अध्यक्ष नंद किशोर यादव जखनि संबोधित कय रहल छलाह तखनि कतेको विपक्षी नेता नारा लगौलनि। एकर बाद विधानसभाक कार्यवाही आई मंगलदिन भोर 11 बजे धरि स्थगित कएल गेल।
बिहारक विधानमंडल केर मानसून सत्र वर्तमान सरकारक अंतिम सत्र अछि। ई मानसून सत्र अगिला 5 दिन धरि चलत। जनतबक अनुसार नीतीश कुमारक नेतृत्व वला सरकार मानसून सत्रमे 12टा विधेयक आनत। एहिमे 4टा मूल विधेयक आ 8टा संशोधन विधेयक होएत। सरकार एहि विधेयककेँ विधान सभा आ विधान परिषद दुनू सदनसँ पारित करा कय कानूनक रूपमे लागू करत।
नीतीश सरकार बिहार विधानसभा आ विधान परिषदमे 57946.2541 करोड़क पहिल पूरक बजट पेश कयलक अछि। स्वास्थ्य मंत्री मंगल पाण्डेय विधान परिषदमे हिन्दू धार्मिक न्यास संशोधन विधेयक, 2025 पेश कयलनि। एकर बाद शोक प्रस्ताव पेश कयल गेल, जकरा बाद सदन केर कार्यवाही आई मंगलदिन भोर 11 बजे धरि स्थगित कय देल गेल।
मानसून सत्रक शुरुआतमे राजद नेता तेजस्वी यादव कहलनि, आइसँ विधानसभा सत्र शुरू भऽ गेल अछि। हमर मांग अछि जे विधानसभामे विशेष गहन समीक्षा (एसआईआर) पर चर्चा होय। बिहार लोकतंत्रक जन्मस्थान अछि आ जौं कियो एतय लोकतंत्रकेँ समाप्त करय केर कोशिश करत तँ हम सब चुप नहि बैसब। हम सब ई लड़ाई लड़ब जे हमर गरीब अपन मताधिकारसँ वंचित नहि होय आ हुनक अस्तित्व मिटाओल नहि जाय।
