जम्मू-कश्मीरक पहलगाममे भेल आतंकी हमलाक बाद केन्द्र सरकार द्वारा पाकिस्तानक खिलाफ लेल गेल कठोर निर्णय सभ पर बिहारक नेता सभ सरकारक समर्थन कएलनि अछि। राष्ट्रीय जनता दल (राजद)क प्रवक्ता मृत्युंजय तिवारी एही आतंकी हमलाकेँ अत्यधिक निन्दनीय बतौलनि आ कहलनि कि 28 निर्दोष लोकनिक हत्या सम्पूर्ण देशकेँ झकझोरि देलक अछि। भारत सरकारक निर्णय उचित अछि। संगहि भाजपा एमएलसी निवेदिता सिंह आ जन सुराज पार्टीक संस्थापक प्रशांत किशोर सेहो भारत सरकारक एहि निर्णयकेँ उचित ठहरेलनि अछि।
राजदक नेता कहलनि कि आतंकवादी सभकेँ ओकरे सभक भाषामे उत्तर देल जाए आ ओकर सफाया कएल जाए। संगहि प्रश्न सेहो उठेलन्हि जे एतेक पैघ पर्यटक स्थल पर पर्याप्त सुरक्षा बल किएक नहि छल आ आखिर केना चूक भेल ? ओ कहला जे पाकिस्तानक खिलाफ जे निर्णय लेल जा रहल अछि, ओ एखन धरिक सभसँ कठोर निर्णय अछि, मुदा इहो सुनिश्चित कएल जाए जे आतंकवादक अड्डा सभकेँ जड़िसँ खत्म कएल जाए।
आरजेडी प्रवक्ता भारतीय जनता पार्टी पर निशाना साधि कहला कि जखनि देशमे मातम पसैर रहल अछि, 28 लोकक चिता ठंढा नहि भेल, मुदा एहेन समयमे राजनीतिक लाभ लेबाक कोशिश लज्जाजनक अछि। ओ कहलनि जे देशक जनता एही दुखसँ आहत अछि आ ककरो राजनीतिक बयानबाजीकेँ माफ नहि करत।
भारतीय जनता पार्टीक एमएलसी निवेदिता सिंह सेहो एहि हमलाक कड़ा निंदा करैत कहलीह जे ई एकटा दुर्भाग्यपूर्ण आ अमानवीय कृत्य अछि। ओ कहलनि, जे महिलाक हाथक मेहंदी केर रंगो नहि उतरल छल, तकर पति केर हत्या कयल गेल। एहेन जघन्य अपराध करय बला, कोनो धर्म वा जातिसँ नहि होइत अछि, हुनकर एकमात्र उद्देश्य दहशत पसारब होइत अछि। ओ प्रधानमंत्री नरेंद्र मोदीक तत्परता केर सराहना करैत कहलनि जे घटनाक सूचना भेटैत ओ विदेश यात्राकेँ स्थगित कय भारत लौटि उच्च स्तरीय बैठक कयलनि। अमित शाह द्वारा पहलगाममे पीड़ित परिवार सभसँ भेंट करबाकेँ ओ संवेदनशील नेतृत्वक उदाहरण बतौलनि।
जनसुराज पार्टीके संस्थापक प्रशांत किशोर कहला कि पहलगाममे भेल आतंकी हमला निंदनीय आ अमानवीय अछि। विपक्ष, समाजक हर वर्ग आ देशक प्रत्येक नागरिक एकर निंदा करैत अछि। जे सभ एहि जघन्य कृत्यकेँ अंजाम देलक, ओकरा खिलाफ सरकारकेँ सभसँ सख्त कार्यवाही करऽ केर चाही। मीडियाक माध्यमसँ भेटि रहल जानकारीक अनुसार, एहि हमलाक जिम्मेदारी लेनिहार संगठननक आधार पाकिस्तानमे अछि। ई पहिल बेर नहि अछि। पिछला कतेको दशकसँ भारतमे भेल आतंकी हमलाक तार पाकिस्तान स्थित संगठन, व्यक्तिक या ओतय केर सरकार अथवा गैर-सरकारी ताकतसँ जुड़ल भेटैत रहल अछि।
