जन सुराज पार्टीक सुप्रीमो प्रशांत किशोर आरोप लगओलनि जे नीतीश सरकारमे अधिकारीक जंगलराज चलि रहल अछि जे दिनमे कलमसँ लूटि रहल अछि।
जन सुराज पार्टीक सुप्रीमो प्रशांत किशोर बिहार सरकारकेँ घेरलनि अछि। ओ आरोप लगओलनि जे नीतीश कुमारक सरकार मात्र ५ गोटे पर चलि रहल अछि। एतय विधायक आ मंत्रीक बात सुनय वाला कियो नहि अछि। ओ कहलनि जे बिहारमे अधिकारीसभक जंगलराज स्थापित अछि आ राज्यक १३ करोड़ जनताक भविष्य मात्र ५ गोटे तय कऽ रहल छथि।
प्रशांत किशोर हमला करैत काल एहेन पाँच गोटेक नाम सेहो लेने छथि। ओ कहलनि, “ओ पाँच गोटे छथि, पहिने नीतीश कुमार स्वयं आ हुनक द्वारा चुनल गेल चारि सेवानिवृत्त अधिकारी, जिनका नहिं तऽ कोनो संवैधानिक आ ने जनताक प्रति कोनो जवाबदेही अछि।
जन सुराज पार्टीक संस्थापक आगू आरोप लगओलनि, “नीतीश कुमार सत्ताकेँ एहि तरहेँ केंद्रीकृत कयने छथि जे जनताकेँ तऽ छोड़ि दियौक, नीतीश राजमे अधिकारी, विधायक आ सांसद सेहो नहि सुनैत छथि। नीतीश सरकारमे ओहि अधिकारीक जंगलराज अछि जे दिनमे कलमसँ लूटि रहल अछि।
प्रशांत किशोर एकटा गंभीर आरोप लगबैत कहलखिन, “बिहारमे एकटा अधिकारी बिना पीसी केर कोनो काज नहि करैत अछि। लालू जीक समयमे अपराधी रातिमे लूट करैत छलाह, मुदा नीतीश कुमारक शासनमे अधिकारी दिनमे लूटि रहल छथि। अफसर राजक परिणाम ई भेल जे पिछला किछु सालमे बिहारमे भ्रष्टाचार बहुत तेजीसँ बढ़ल अछि।
बिहारमे अगिला साल विधानसभा चुनाव हेबाक अछि। हालक उपचुनावमे निराशाजनक परिणामक बाद प्रशांत किशोर कहने छलाह जे हुनकर पार्टी अगिला सालक विधानसभा चुनावमे २४३ सीटपर चुनाव लड़त। ओ इहो कहलनि जे जनताकेँ मनाबय आ समझाबय केर काज हर संभव होयत। जँ जनता बुझैत अछि तँ ठीक अछि, आ जँ ओ नहि बुझैत अछि तखनि भगवान मालिक।
