बिहार बनल भारतक ‘क्राइम कैपिटल’ : राहुल गांधी

राजगीर समदिया
*

बिहारक राजगीरमे संविधान सुरक्षा सम्मेलनकेँ संबोधित करैत राहुल गांधी कहलनि जे बिहारकेँ भारतक क्राइम कैपिटल बना देल गेल अछि।

शुक्रकेँ कांग्रेस पार्टीक सांसद आ लोकसभामे विपक्षक नेता राहुल गांधी नालंदाक राजगीर पहुँचलाह। एतय ओ संविधान सुरक्षा सम्मेलनकेँ संबोधित कएलनि। एतय राहुल गांधी कहलनि जे भाजपा आ सीएम नीतीश बिहारकेँ क्राइम कैपिटल बना देलनि अछि।

राहुल गांधी कानून व्यवस्था केर लऽ कऽ सीएम नीतीशक नेतृत्व वाला बिहार सरकार पर निशाना साधलनि। राजगीरमे राहुल गांधी कहलनि जे बिहारकेँ सत्य, न्याय आ अहिंसाक धरती कहि सकैत छी मुदा 21म सदीमे एकरा ‘क्राइम कैपिटल ऑफ इंडिया’ केर डेफिनेशन देल गेल अछि। ‘शुरुआत कतय भेल, अहाँक सोच कतय-कतय पहुँचल। जापान, कोरिया, वियतनाम, चीन सभ लग सोच बिहारेसँ गेल छल। मुदा भाजपा आ सीएम नीतीश बिहारकेँ ज्ञानक भूमिसँ गिरा कऽ भारतक क्राइम कैपिटल बना देलनि अछि।

राहुल गांधी बिहारमे हालक केंद्र सरकार द्वारा जातिगत जनगणनाक निर्णय पर सेहो बात कयलनि। ओ दावा कयलनि जे “मोदी सरकार कहियो असली जातिगत जनगणना नहि कराओत। किएक तऽ जहिया ई सभ असली जातिगत जनगणना कऽ लेत, ओहि दिन हिनकर राजनीति खत्म भऽ जायत।” राहुल गांधी दावा कयलनि अछि जे भाजपाक जातिगत जनगणनाक मॉडलमें बंद कक्षमे अधिकारी सभ प्रश्न तय कएलनि, जाहिमे 90% आबादीक कियो नहि छल।

राहुल गांधी दावा कयलनि कि ओ संविधानक रक्षा करबा लेल आ देशक बेहतरीक लेल जाति जनगणनाक लेल लड़ि रहल छथि। राहुल गांधी कहला जे भविष्यमे हम जहिया सरकार बनायब, हम आरक्षण पर 50 प्रतिशतक सीमा हटा देब आ एकर शुरुआत बिहारसँ कयल जायत।