आगामी विधानसभा चुनावसँ पहिने बिहारक राजनीतिमे एक बेर फेर गर्मी आयल अछि। राष्ट्रीय जनता दल (राजद)क राष्ट्रीय अध्यक्ष लालू प्रसाद यादव शनिदिन पटनासँ मुजफ्फरपुरक लेल रवाना भेलाह, तँ वैशाली जिलाक भगवानपुरमे हुनक भव्य स्वागत कएल गेल। एहि मौका पर सैकड़ो कार्यकर्ता जुटल आ राजदक वरिष्ठ नेता केदार प्रसाद यादवक नेतृत्वमे लालू प्रसाद यादवकेँ जोरदार अभिनंदन कएल गेल।
एहि स्वागतमे सभसँ खास रहल लालू यादवक लेल तैयार कएल गेल पारंपरिक भोज। लालू यादवकेँ परोसल गेल मकईक रोटी, बथुआक साग, लिट्टी आ चोखा। केदार यादव एहि भोजक सामग्री खास अपन घर पर बनबौने छलाह। ओ भावुक भऽ कऽ कहलनि जे हम तँ सुदामा छी आ आइ कृष्ण भगवान (लालू यादव) हमर हाथसँ रोटी-साग खा रहल छथि। एहिसँ पैघ खुशी हमर जीवनमे किछु नहि भऽ सकैत अछि।
एही क्रममे लालू प्रसाद यादव कार्यकर्ता सभकेँ स्पष्ट संदेश देलनि जे आब समय आएल अछि जे सभ चुनावी अभियानमे जुटि जाइ। हुनक कहनाइ छल जे एहि बेर तेजस्वी यादव बिहारक मुख्यमंत्री बनत आ जनता केर आशीर्वाद प्राप्त भ’ रहल अछि। ओ कहलनि जे राजदक नीति आ जनहितकारी वादाकेँ गाम-गाम धरि पहुँचाबय केर जिम्मेदारी कार्यकर्ता सभक अछि।
घोषणापत्रक वादाकेँ घर-घर पहुँचेबाक लेल लालू यादव राजदक घोषणा पत्रक उल्लेख करैत कहलनि जे सरकार बनलाक बाद महिलाकेँ ₹2500 प्रतिमाह सहायता देल जाएत, गैस सिलेंडर ₹500 मे भेटत, वृद्धा पेंशन ₹400 सँ बढ़ा कए ₹1500 कएल जायत आ बिजली फ्री यूनिटक सुविधा सेहो लागू होयत।
बताओल जाइत अछि जे जखन लालू यादव उत्तर बिहार दिसि यात्रा करैत छथि, केदार यादव हुनका लेल मनपसंद भोजनक विशेष व्यवस्था करैत छथि। किछु दिन पहिने सेहो लालू यादव स्वयं फोन कए केदार यादवसँ लिट्टी-चोखाक मांग कयने छलाह, जकरा ओ बहुत खुशीसँ खयलनि।
