बिहारमे भेल कैबिनेटक अहम बैसारमे गया शहरक नाम बदलय पर मुहर लागल अछि। ओतय ऑपरेशन सिंदूरक तहत शहीद भेल जवानक परिजन सभकेँ 50 लाख रुपयाक सहायता देबाक बात कहल गेल अछि।
बिहारमे शुक्रदिन (16 मई) केँ कैबिनेटक अहम बैठक भेल, जाहिमे मुख्यमंत्री नीतीश कुमारक संग तमाम पैघ मंत्री उपस्थित रहलाह। बिहार कैबिनेटमे नीतीश सरकार 69 एजेंडा पर मुहर लगेलक अछि। एहि बैसारमे गया शहरक नाम बदलनाइसँ लऽ कऽ सरकारी कर्मचारी सभक डीए बढ़ेबाक समेत कतेको महत्वपूर्ण फैसला पर मुहर लागल अछि।
एहि बैसारमे सातम केंद्रीय वेतनमानक तहत वेतन पेंशन पाबय वला सरकारी कर्मी सभक लेल महंगाई भत्ता 53% सँ बढ़ा कय 55% केर निर्णय लेल गेल। कुल 2% प्रतिशत महंगाई भत्ताक वृद्धि कयल गेल अछि। ओहि ठाम छठम वेतनमानक तहत वेतन आ पेंशन पाबय वाला सरकारी कर्मी सभक लेल 6% महंगाई भत्ताक बढ़ोतरी भेल अछि। पाँचम वेतनमानक तहत वेतन आ पेंशन पाबय वाला सभक लेल 11% महंगाई भत्ताक वृद्धि भेल अछि, एकर स्वीकृति काल्हि कैबिनेटमे भेट गेल। महंगाई भत्तामे बढ़ोतरीसँ राज्य सरकार पर 1070 करोड़ रुपैयाक अतिरिक्त भार पड़त।
कैबिनेटक बैसारमे गया शहरक नाम बदलय केर स्वीकृति सेहो भेटि गेल अछि। आब नव नाम गया जी भ’ गेल अछि। सामान्य प्रशासन विभाग द्वारा गया शहरक नाम बदलि गयाजी करबाक प्रस्ताव आयल छल, जकरा बिहार कैबिनेट द्वारा मंजूरी देल गेल अछि।
एकर संगहि पूर्व उपमुख्यमंत्री सुशील मोदीकेँ जन्मतिथि प्रत्येक वर्ष 5 जनवरीकेँ राजकीय समारोहक रूपमे मनाओल जायत। एकर मंजूरी सेहो कैबिनेटसँ भेटल अछि। तहिना जीविका दीदीक लेल अलग बैंक होएत, जन्म-मृत्यु केर रजिस्ट्रेशन आब गाम स्तर पर पंचायत सचिवक माध्यमसँ भऽ सकत आ नवका आंगनबाड़ी केन्द्र सभक सेहो मंजूरी भेटल अछि। पंचायत सरकार भवनक लेल 27 अरब रूपयाकेँ राशि स्वीकृत कयल गेल अछि।
