केन्द्रीय वित्त मंत्री निर्मला सीतारमण लोकसभामे २०२५-२६क बजट प्रस्तुत कयलनि। एहि दौरान ओ बिहारक किसान सभकेँ एकटा पैघ उपहार देलनि। केन्द्रीय वित्त मंत्री मखानाक उत्पादन, विपणन आ प्रसंस्करणकेँ बढ़ावा देबाक लेल बिहारमे मखाना बोर्डक स्थापनाक घोषणा कयलनि अछि।
मानल जा रहल अछि जे ई घोषणा बिहारक किसान लेल लाभदायक साबित होयत आ मखान बोर्डक गठन हुनका आओर बेसी लाभ दऽ सकैत अछि। वर्तमानमे बिहारमे लगभग ३५ हजार हेक्टेयर क्षेत्रमे मखानाक खेती कयल जाइत अछि। 25 हजार किसान एकरासँ जुड़ल छथि। बिहार ओ राज्य अछि जे देशमे सबसँ बेसी मखानाक उत्पादन करैत अछि।
सरकार मखानाक उत्पादन बढ़ेबाक प्रयास कऽ रहल अछि। हालहिमे पटनामे आयोजित मखान महोत्सवमे कृषि मंत्री मंगल पाण्डेय कहलनि जे मुख्यमंत्री नीतीश कुमारक निर्देशनमे मखान उत्पादन बढ़ेबाक प्रयास कयल जा रहल अछि। सब्सिडी पहिनेसँ देल जा रहल अछि। हमर लक्ष्य अगिला दू-तीन साल मे ५०-६० हजार हेक्टेयरमे एकर खेती करब आ ५० हजार किसान के मखानक खेतीमे शामिल करब अछि।
केन्द्रीय वित्त मंत्री निर्मला सीतारमण पटनामे स्थित आईआईटीक विस्तारक घोषणा सेहो कयलनि। केंद्र सरकारक एहि निर्णयसँ बिहारक युवाके महत्वपूर्ण लाभ भेटत। एम्हर केन्द्र सरकार बिहारमे राष्ट्रीय खाद्य प्रौद्योगिकी, उद्यमिता आ प्रबंधन संस्थानक स्थापना करबाक निर्णय लेलक। केन्द्रीय वित्त मंत्री कहलनि जे २०१४क बाद खोलल गेल ५ आईआईटीमे अतिरिक्त बुनियादी ढाँचा विकसित कयल जायत। एहिसँ अतिरिक्त ६,५०० छात्रकेँ शिक्षा भेटत। छात्रावास आ अन्य बुनियादी ढांचाक विस्तार कएल जाएत। वित्त मंत्री निर्मला सीतारमण शनिदिन २०२५क बजट प्रस्तुत कयलनि। एहि साल बिहारमे विधानसभा चुनाव हेबाक अछि। पहिनेसँ आशा छल जे केन्द्र सरकार बिहारक लेल महत्वपूर्ण उपहार देत।
