मानसून सत्रक दोसर दिन मंगलकें विपक्षक दिसिसॅं भारी हंगामा भेल। पहिने विपक्षी विधायक सब कारी कपड़ा पहिरने सदनक बाहर विरोध प्रदर्शन केलनि। बादमे सदनक कार्यवाहीक दौरान एस.आई.आर. केर विरोधमे प्रदर्शन भेल, पुनः विधानसभा अध्यक्ष सदनक कार्यवाही 2 बजे धरि स्थगित कय देलनि।
भोजनक बाद जखनि कार्यवाही शुरू भेल तॅं विपक्ष फेर नाराबाजी करय लागल। नीतीश कुमार मुर्दाबादक नारा लागल। लंच ब्रेकक बाद सदन फेरसॅं शुरू होइत देरी तेजस्वी यादव कहलनि जे, “स्थगन प्रस्ताव आनल गेल अछि, बिहार लोकतंत्रक जननी अछि आ बिहारमे लोकतंत्रकें अंत करबाक प्रयास भऽ रहल अछि। बिहारमे एसआईआरक प्रक्रियाक मामिलामे जांच हेबाक चाही।”
एसआईआरक संबंधमे महागठबंधनक विधायक सब वेल पर जा कए कुर्सी उठा लेलनि। मार्शल रोकैत रहल। भारी हंगामा भेल आ मार्शल आ विधायकक बीच धक्का-मुक्की सेहो भेल। इंडी एलायंसक विधायक सब वेलमे रिपोर्टरक टेबुलक पास राखल कुर्सीक उठा लेलक, मुदा मार्शल कुर्सी छीन लेलक।
एकर संग विपक्ष केर एही कड़ा हंगामाक बीच सदन द्वारा वस्तु आ सेवा कर संशोधन विधेयक २०२५ पारित कयल गेल। महागठबंधन विधायक आ मार्शलक बीच भारी हंगामा आ धक्काक कारण सदनक कार्यवाही दोसर दिन यानी बुध दिन धरि स्थगित भऽ गेल।
