बिहारक 19 जिलाक डीएम सहित 38 आईएएस अधिकारी प्रशिक्षण लेल जाएत मसूरी

पटना । समदिया

बिहार सरकार प्रशासनिक कार्यक गति आ गुणवत्ता सुधारबाक लेल एकटा महत्वपूर्ण निर्णय लेलक अछि। राज्य सरकार 38 आईएएस (भारतीय प्रशासनिक सेवा) अधिकारी सभकेँ मसूरी स्थित लाल बहादुर शास्त्री राष्ट्रीय प्रशासन अकादमीमे प्रशिक्षण लेल पठा रहल अछि। एहि संबंधमे आधिकारिक अधिसूचना जारी कएल जा चुकल अछि, जाहिमे अधिकारी सभक सूची सेहो शामिल अछि।

ई प्रशिक्षण 11 मईसँ शुरू भ’ क’ 5 जून धरि चलत। प्रशिक्षणक दौरान अधिकारी सभकेँ प्रशासनिक दक्षता, नीति निर्माण, सुशासन आ आधुनिक प्रबंधन तकनीक सभ पर विशेष रूपसँ जानकारी देल जाएत।

एहि प्रशिक्षणक खास बात ई अछि जे राज्यक 19 जिलाक जिलाधिकारी (डीएम) सेहो एहिमे हिस्सा लेताह। जाहि जिलाक डीएम सभ शामिल छथि, ताहिमे पूर्णिया, वैशाली, भोजपुर, औरंगाबाद, नवादा, कैमूर, मुंगेर, बक्सर, अरवल, शेखपुरा, सीतामढ़ी, मधेपुरा, अररिया, कटिहार, सारण, सिवान, किशनगंज आ पश्चिम चंपारण शामिल अछि।

सरकारक मानब अछि जे एहि तरहक प्रशिक्षण कार्यक्रमसँ अधिकारी सभक कार्यकुशलता बढ़त आ राज्यमे सुशासनकें मजबूती भेटत। प्रशिक्षित अधिकारी अपन-अपन क्षेत्रमे विकास कार्य आ प्रशासनिक व्यवस्थाकें बेसी प्रभावी बना सकताह।

प्रशिक्षणक उद्देश्य प्रशिक्षणक दौरान नीति निर्माण, नेतृत्व क्षमता, प्रबंधन कौशल आ जनसेवासँ जुड़ल विषय सभ पर जोर देल जाएत, जाहिसँ प्रशासनिक कार्यमे सुधार आएत आ आम जनताकें बेहतर सेवा भेटत।

प्रशिक्षण लेल जाएवाला डीएम सभमे प्रमुख छथि— प्रतिमा रानी (शिवहर), नितिन कुमार सिंह (कैमूर), निखिल धनराज निप्पणीकर (मुंगेर), साहिला (बक्सर), अमृत बैंस (अरवल), शेखर आनंद (शेखपुरा), अभिषेक रंजन (मधेपुरा), विनोद दूहन (अररिया), वैभव श्रीवास्तव (सारण), विवेक रंजन मैत्रेय (सिवान), विशाल राज (किशनगंज), तरंजोत सिंह (पश्चिम चंपारण), तनय सुल्तानिया (भोजपुर), अभिलाषा शर्मा (औरंगाबाद), रवि प्रकाश (नवादा), अंशुल कुमार (पूर्णिया), वर्षा सिंह (वैशाली), रिची पांडेय (सीतामढ़ी) आ आशुतोष द्विवेदी (कटिहार)।

एहि केर अलावा उद्योग, वित्त, स्वास्थ्य, नगर विकास, शिक्षा, परिवहन आ आन विभाग सभक कएकटा वरिष्ठ अधिकारी सेहो प्रशिक्षणमे शामिल होएताह। एहिमे मुकुल कुमार गुप्ता, अभय झा, कृष्ण कुमार, रूबी, संजय कुमार, संजीव मित्तल, अनिल कुमार, योगेश कुमार सागर, कुमार गौरव, आरिफ हसन, वैभव चौधरी, विजय प्रकाश मीणा, राजेश परिमल, विजय कुमार, मुमताज आलम, राशिद कलीम अंसारी, अमित कुमार, विनय कुमार आ अभय कुमार सिंह प्रमुख छथि।

एहि पहलसँ बिहारक प्रशासनिक व्यवस्थामे सकारात्मक बदलाव आओत, एहि तरहक आशा कएल जा रहल अछि।