भोजपुरमे 20 कौआक रहस्यमय मृत्यु, बर्ड फ्लूक आशंकासँ इनकार

पटना समदिया
*

बिहारक भोजपुर जिलामे पछिला दू दिनमे कमसँ कम २० कौआक रहस्यमय ढंगसँ मृत्यु भऽ गेल अछि, जाहिसँ क्षेत्रमे दहशत पसरि गेल अछि। यद्यपि, अधिकारी बर्ड फ्लूक सम्भावनासँ इनकार कयलनि अछि।

भोजपुर पशुपालन आ मत्स्य पालन अधिकारी डॉ. दिनकर दिवाकर एहि असामान्य घटनाक्रमक पुष्टि करैत कहलनि जे मृत कौआक शव गामक बाहरी इलाकामे सागौनक बागमे भेटल छल।

डॉ. दिवाकर कहलनि, “हम मृत कौआक नमूना एकत्र कऽ कोलकाता’क क्षेत्रीय रोग निदान प्रयोगशालामे भेजने छी। प्रारंभिक जाञ्चमे बर्ड फ्लू (एवियन इन्फ्लूएंजा)क कोनो लक्षण नहि भेटल अछि। ”
सम्भावित संक्रमणकेँ रोकबाक लेल अधिकारी सभ मृत चिड़ैकेँ गामक लग सुरक्षित रूपसँ दफन कऽ देने छथि। मुदा, एहि घटनासँ स्थानीय लोकमे चिन्ता बढ़ि गेल अछि आ ओ सभ कोनो सम्भावित संक्रमणकेँ लऽ कऽ आशंकित छथि।

विशेषज्ञसभक अनुसार, जाहि क्षेत्रमे कौआक मृत्यु भेल छल, ओहि क्षेत्रक ४-५ किलोमीटरक दायरामे कोनो मुर्गीपालन फार्म नहि अछि, जाहिसँ बर्ड फ्लूक प्रसारक सम्भावना कम भऽ जाइत अछि। तैयो पशुपालन विभागक एकटा दल घटनास्थलक दौरा कयलक आ गामक लोकसभकेँ सतर्क रहबाक सलाह देलक।

एहिसँ पहिने, पछिला मासक १८ फरवरीकेँ जहानाबाद जिलामे दर्जनों कौआ रहस्यमय ढंगसँ मरि गेल छल। जाञ्चमे पुष्टि भेल जे ओहि कौआसभमे एवियन इन्फ्लूएंजा (बर्ड फ्लू)क एच५एन१ प्रजाति छल, जे अत्यधिक संक्रामक अछि आ मनुष्यमे सेहो पसरि सकैत अछि।

जहानाबादमे बर्ड फ्लूक पुष्टि भेलाक बाद जिला प्रशासन तत्काल एहतियाती उपाय कयलक आ स्थानीय लोकसभकेँ सतर्क रहबाक सलाह देलक। तहियासँ स्वास्थ्य आ पशुपालन विभाग सतर्कता बढ़ा देलक अछि आ लोकसभसँ चिड़ैसभक कोनो असामान्य मृत्युक सूचना देबाक आग्रह कऽ रहल अछि।