केन्द्रीय वित्त मंत्री निर्मला सीतारमण मोदी सरकारक तेसर कार्यकालक पहिल बजटमे बिहारक लेल अतिरिक्त मददिक घोषणा कयलनि। वित्त मंत्री बिहारकेँ २६ हजार करोड़ रुपयाक आवंटनक घोषणा कयलनि। एहि पर बिहारक पूर्व मुख्यमंत्री राबड़ी देवी कहलनि जे बजटमे बिहारकेँ भेटल बस झुनझुना।
ओ कहलनि जे केंद्र सरकार जनताकेँ धोखा देबाक काज करैत अछि। नीतीश कुमारक माँग पूरा नहिं भेल, हुनका एनडीए छोड़बाक चाही। राज्यमे बाढ़ि आबि रहल अछि, पुल ढ़हि रहल अछि, लोकक घर डूबि रहल अछि, एहि पर कोनो काज नहिं भऽ रहल अछि। बिहारमे रोजगार नहिं अछि। खाद आ बीया महग भए रहल अछि। किसानकेँ बिजली नहिं भेटि रहल अछि।
जनतब जे केन्द्रीय वित्त मंत्री निर्मला सीतारमण लोकसभामे आम बजट प्रस्तुत करैत बिहारक लेल कतेको योजनाक घोषणा कयलनि।
बजटमे बिहारमे चारिटा नव एक्सप्रेस-वे बनयबाक प्रस्ताव अछि। एकरा लेल २६ हजार करोड़क पैकेजक घोषणा कएल गेल अछि। एकरा अलावा २१ हजार करोड़क पावर प्लांटक सेहो घोषणा कयल गेल अछि।
एहिसँ पहिने सोमकेँ केन्द्र सरकार साफ कहि देने छल जे मौजूदा प्रावधानक अंतर्गत बिहारकेँ विशेष राज्यक दर्जा नहिं देल जा सकैछ।
